Rai ka Sorkar ban pynduh noh ia ka interview ha ka jingthungkam Group-D

Syllad | The Rising MeghalayaJuly 11, 2025

Ha ka jingpyrshang ban wanrah ia ki rukom treikam kaba shai bad kaba khuid ba suba ha ka thungkam thungjam, ka sorkar jylla ka la mynjur ban pynsangeh noh ha kaba iadei bad ki jingpynlong ia ki interview ha ka thungkam naka bynta ki Group-D ha baroh kawei ka jylla.

Haba pynbna ia kane ka rai kaba kongsan ba la shim da ka kynhun Myntri ha ka jingialang kaba la long haka 10 tarik Naitung hapoh ka iingsah jong u Myntri Rangbah ka Jylla, na ka liang u Myntri sorkar u Bah Paul Lyngdoh u la ong ba kane ka rai ka dei kaba iaid katkum ka policy ka sorkar ban pynthikna ia ka jingtreikam kaba shai bad khuid ha ka liang ka thungkam thungjam bad kaba iaid ruh katkum ka jingbthah da ka Tnad Personnel and Training, Ministry of Personnel, Public Grievances and Pension.

“Ha kaba iadei bad kane ka rai, ia baroh ki jingthungkam ha ki kam Group-D yn pynlong noh khlem da donkam shuh ban leh interview. Kane kan treikam naduh ka 1 tarik Risaw 2025, kata kaba mut ba kan sdang ban treikam noh nangne shakhmat,” ong u Bah Paul haba kren sha ki lad pathai khubor.

“Kane ka mut ruh ba baroh ki interview kiba la buh ban pynlong naduh ka 1 tarik Risaw mynta u snem la pynsangeh noh bad ba ki nongaplai kam kim donkam shuh ban shong na ka bynta ka interview,” bynrap u Bah Paul.

Katkum ka jongong ka jong u, kane ka rai kan iarap ruh ban pynkloi ia ka rukom thungkam thungjam ha ki kam bapher bapher bad ban pynthikna ia ka jingtreikam kaba shai bad kaba khuid ba suba.