Rai ka Sorkar ban pyndep noh kloi ia ka jingthied jaka ban pynheh ia ka Shillong Airport

Syllad | The Rising MeghalayaAugust 21, 2025

Ka sorkar Meghalaya ka la rai ban pynkloi ban pyndep noh ha kaba iadei bad ka jingthied jaka na ka bynta ka project ban pynheh ia ka Shillong Airport ha Umroi.

Haba kren sha ki lad pathai khubor ha ka 20 tarik Nailar, u Symbud Myntri Rangbah uba khmih ia ka Tnad Transport, u Bah Sniawbhalang Dhar u la kular ba kan ym don kano kano ka jingpynslem na ka liang ka sorkar, kata da kaba pynpaw ba ka Tnad ryngkat ki ophisar jong ka ki la trei shitom ban pyndep noh ha kaba iadei bad kane ka jingthied jaka.

Ka Sorkar ka la mynjur ia ka jingtyrwa ban thied haduh 11.75 akar ka jaka na ka bynta ka jingpynheh ia kane ka project, ha ryngkat ka jingsiew bai lutksan kaba long T.72.17 klur sha ki trai jaka.

Ka Airports Authority of India (AAI) ka donkam haduh 22 akar ka jaka na ka bynta kane ka jingpynheh, bad ka Tnad Iada ri ka la mynjur ban ai 10.3 akar da ka jingiateh leave-and-license.

U Bah Sniawbhalang u pyntip ba katba ia ka tender na ka bynta kane ka jingpynheh ia ka kad liengsuin la dep ban pyllait bad plie, hynrei ia ka kam yn dang aiti. “Ka Sorkar kan pynsted katba lah ban pyndep noh ia kane ka kam thied jaka” ula ong.

Ka jingpynheh ia kane ka project ka thmu ban pynjrong ia ka runway na ka 1,829 mitar sha ka 2,400 mitar ka ban pynlah ia ki liengsuin heh kum ka Airbus ba kin hiar bad ban nangpynkhlain ia ki lad pyniasoh sha ki nongbah ba kongsan jong ki jylla ha ka ri.

Ha ka 13 tarik Nailar ka Iingkashari Meghalaya High Court ka la kynthoh halor ka jingiaid suki ka project pynheh ia ka Shillong Airport bad bthah ia ki bor sorkar ka Jylla bad sorkar Pdeng ba kin pynsted ia ki kam khnang ban pynthikna ban lah ban pyndep noh kloi katba lah.