Rai ka sorkar ban pyndap iaki 1500 tylli ki kam ba lait, da ka eksam bad interview ban thungkam pura ia ki nongtrei adhoc

Syllad | The Rising MeghalayaAugust 27, 2025

Ka sorkar jylla ka la shim ia ka rai ban pynlong da ka eksam bad interview na ka bynta ban thungkam pura ia ki nongtrei adhoc ba la thungkam hadien jong ka 31 tarik Nohprah 2007.

Hadien ba la dep pyniaid ia ka jingialang ka Kynhun Myntri ha ka 26 tarik Nailar, u Myntri Rangbah ka Jylla u Conrad K Sangma u la pynbna ba ka sorkar kan pyndap kumba 1500 tylli ki kam kiba lait lyngba kane ka jingjied.

Ha ki snem kiba la leit, ka sorkar ka la thungkam pura ia ki nongtrei ba thung adhoc hashwa ka 31 tarik Nohprah 2007, kaba ktah ia kumba 3000 ngut ki briew katkum ka hukum jong ka iingkashari Supreme Court.

“Mynta hadien u 2007, ki dang don ki nongtrei achoc ba shu thung bad kumta ka jingkylli ka mih ba ka sorkar kan leh kumno ia ki. Mynta, ka iingkashari Supreme Court kam shym la ailad ia ngi ban iaid shakhmat bad shu thungkam pura beit beit ia kine ki briew kiba trei ha kita ki kam. Kumta ka sorkar kan hap ban iaida da ka lynti ban pynlong da ka eksam bad interview..lada phim thungkam pura ia kine ki kam, kumta ruh lada shu iakren..kine ki kam kin long thylli noh watla ki don ki nongtrei adhoc. Kumta, ngi la shim ia ka rai ba yn sa thung pyndap noh ha baroh kine ki kam kiba lait,” ong u Conrad haba kren sha ki lad pathai khubor.

U Myntri Rangbah u la pynbna ba ka sorkar kan sa ailad da kaba pynjynsur ia ka rta ioh kam kaba tang shisien ia ki nongtrei achoc kiba la trei 10-15 snem khnang ba kin ioh ban iakhun ia ka eksam.

“Ka Kynhun Myntri ka la mynjur ruh ia ka SOP ha kaba iadei bad ka jingpynlong ia ki eksam bad interview, kaba kynthup ia ka kyndon ka ban ailad ia ka rta ioh kam ia ki kyrtong kiba dei hok ban ioh,” u la ong.

Katkum ka jingong ka jong u, ka sorkar ka thmu ban ai ia kajuh ka lad ia baroh ki nongtrei adhoc ba kin iakhun ia ka eksam na ka bynta kine ki kam, da kaba pynthikna ba kin ym shah ktah namar ka rta lane na kiwei kiwei pat ki daw.