Rai ka Sorkar ban pynbeit ia ka rukom treikam ban weng ia ki jingeh ki nongtrei ka 108

Syllad | The Rising MeghalayaAugust 20, 2025

Ka Myntri ka Tnad ka koit ka khiah ka Kong Ampareen Lyngdoh ka la pynbna ba ka sorkar ka la rai ban thaw ia ka rukom treikam kaba thymmai khnang ban weng ia ki jingeh kiba ki nongtrei ka 108 Emergency Services ki iakynduh ha Meghalaya.

Ka Myntri ka la pynpaw ruh ba ka sorkar ka dang pynkhreh ia ka buit treikam ban pynbeit ia kane ka jingeh kiba iadei bad ka jingthmu ban aiti noh ia ka Emergency Service sha ka jingpyniaid jong ki kompeni shimet.

Haba kylli halor ka jingdawa ba dang shen jong ki nongtrei 108 ban kyntiew ia ka tulop da T.5000, ka Myntri ka la ong ba ka jingpynkiew ka dei kaba dang shu pyndep shen bad ong, “To ngin ym iakren kumne sha ki lad pathai khubor namar ki nongtrei ka 108 bad nga kaba mihkhmat ia ka sorkar bad u MD (ka National Health Mission) ngin sa iakynduh lada donkam, hynrei ka jingiakynduh ba khatduh ka jong ngabad ki kiei kie baroh ki long kiba biang.”

Haba pynpaw ba ka sorkar kam pat don satia ia ka rukom treikam ia mynta bad ba ka NHM ka dang iai bteng ban pyniaid ia ki nongtrei, ka Myntri ka la ong, “Dang shen ia ki katto katne ki kam la hap ban ai wai sha ka Shishupal company. Ngi dang pynkhreh ban pynthikna ba ngin don noh ia ka rukom treikam la ka jong. Kaei kaba ka sorkar kan leh, ngi dang iakren ha ka kyrdan jong u Myntri Rangbah. Kan ym long ia nga ban ong ei ei ia ka kam kaba dang don hapdeng ka jingbishar.”

Nalor kata ka Myntri ka la pynpaw ba ka sorkar ka la iakynduh jingeh ban sumar ia ki ambulance namar ka jingdon don ka kompeni ka ban khmih ia ki.

Ha kaba iadei bad ka jingslem ban aiti ia ka 108 service sha ki kompeni shimet, ka Myntri ka la ong ba kane ka kam ka iaid palat ia ka jingkhot tender bad mynta ka dei ka kam ban wad ia ka buit treikam ne formula kumno ban pynbeit ia ki jingiapher jingmut hapdeng ki kynhun kiba ia don bynta.

Ka Myntri ka la kular ruh ba ka sorkar ka la kut jingmut ban pynthikna ba ki nongtrei 108 kin shah pynhap ha ka insurance bad kiwei kiwei ki jingmyntoi, kata da kaba khmih halor ki kam ba ki trei.

Ka la ai ruh ka jingiaroh ia ka jingshakri kaba bha jong ki nongtrei bad ban jur ba ki long ka bor treikam kaba kongsan.