Rai ka Sorkar ban bei T.6.6 klur ban kyrshan ia 165 ngut ki samla pule Hotel Management

Syllad | The Rising MeghalayaSeptember 3, 2025

Ka Sorkar jylla kan pynlut haduh T.6.6 klur ban kyrshan ia 165 ngut ki samla ki ban leit pule B.Sc ha ka Hospitality bad Hotel Management na ka bynta kine ki san snem ki ban wan.

Ia kane la pynbna da u Myntri ka Tnad Tourism u Bah Paul Lyngdoh ha ka jingpyllait ia ka Chief Minister Hospitality Scholarship Programme (CMHSP) ha ka 2 tarik Nailur.

U Bah Paul u la ong ba ka thong jong kane ka Scholarship programme ka long ban pynshlur ia ki lain jingpule kiba kham shalor ha ka Hospitality, ban btin lynti bad ban saindur ia ki samla na ka bynta ban ioh ki lad treikam ha kylleng ki ri ka pyrthei bad ban pynkhlain ia ka jingdon jong ka kynhun ki nongtrei ba tbit ka jylla ha ka Hospitality.

“Kan don ka jingkyrshan bai klas ei kaba shispah percent ia ki samla kiba leit pule B.Sc ha ka hospitality bad hotel management hapoh IHM Shillong,” u la ong da kaba bynrap ba ka sorkar kan kyrshan haduh 165 ngut ki samla pule ha kine ki san snem ki ban wan, ha kaba 55 ngut ki samla pule (na man kawei ka block) ki ban ioh ia ka scholarship ha ki laitylli ki batch.

U la ong ruh ba ki samla pule ki dei ban long ki nongshong shnong ba pura ka Meghalaya, kiba la pyndep ia ka klas XII kaba kynthup ia ka English kum kawei na ki sobjek bad kaba ka jingioh kamai jong ka longiing ha ka shi snem ka dei ban long hapoh ka T.3 lak.Kan ym don sata ka jingpyrkhing ha kaba iadei bad ka rta.

Ka jingjied ia ki samla pule kan long katkum ka jinglah ka jong ki bad ka jingangnud ka jong ki ha kaba ia ka jingjied kaba khatduh yn lah da ka State Level Selection Committee.

“Ia ka bai klas yn siew da ka sorkar Meghalaya ha kaba ka jingbei tyngka ban aijingkyrshan ia baroh 165 ngut ki samla pule ha ki san snem kan kot sha ka T.6.6 klur, kata kaba kut kumba T.3.6 lak na ka bynta iwei pa iwei samla pule,” ong u Bah Paul.

Katkum ka jingong ka jong u, ki samla pule kin hap ban pynlut hi na lade tang na ka bynta ka bai hostel, ka bam, ka uniform bad kiwei kiwei ki jingdonkam.