Rai ka KSU ban pynher krad ia ki mynder da kaba pyntreikam ia la ka jong ka ILP 

Syllad | The Rising MeghalayaAugust 18, 2025

Ka Khasi Students Union (KSU) ka la rai ban pynjur ban pyntreikam ia la ka jong ka Inner Line Permit (ILP) ha Meghalaya ban tehlakam ia ka jingwan rung kyrthep ba khlem sangeh jong ki mynder ri sha kane ka jylla.

Ka KSU ka la kam ba kam don lad shuh da kumwei pat hynrei ban shim ia ka ain ha la ka jong ka kti namar ka jingpynslem palat pud jong ka Sorkar Pdeng bad Sorkar Jylla ban pyntreikam ia ka ILP ha kane ka jylla.

Ka KSU ka la dawa ruh na ka Sorkar Pdeng ban ai ia ka Meghalaya da ki shipai territorial army kaba iasyriem kumba la ai ia ka Mizoram na ka bynta ban iada ia ki jaka khappud bad na ka bynta ka bha ka miat jong ka jylla.

Haba kren sha ki lad pathai khubor shibynta ka jingiakhih shong kyllain mungor ba la khot pynlong da ka North East Student Organizations (NESO) haka 18 tarik Nailar ha Shillong, u General Secretary ka KSU u Samla Donald V Thabah u la ong, “Ngi la pynlong ia ka jingiakhih ban dawa pyntreikam noh mardor ia ka ILP. Hynrei, na ka liang ka Sorkar Pdeng bad sorkar Jylla ki la sngap mynthi. Ka sorkar jylla kam shym la shim khia ban buddien ia kane ka kam bad ka sorkar Pdeng. Kumta, ka KSU kam banse ban pyntreikam ia la ka jong ka ILP ha ka jylla jong ngi ha kaba ki volunteer ki la bteng ban pynlong ia ki jingkhynra, ki jingtalasi bad pynher krad ia ki mynder kumjuh ia ki briew kiba artatien kiba wan rung sha kane ka jylla.”

Haba kylli, u samla Donald u la ong, “Ngi hap ban shim ia ka ain ha la ki jong ki kti. Ngi  shah pynbor ban leh ia kane namar ba ym don ain ki ban iada ia ka jinglong jingpang bad ia ki hok jong ki trai ri trai muluk.”

Haba kdew halor ka jinglong jingman ba mynta ha Bangladesh bad halor ka jingkyndang  ka sorkar Assam ia ki mynder ri, une u nongialam ka KSU u la ong, “Ngi sngewkhia jur namar kine ki briew kiba la shah kyndang na Assam bad kiba shah thombor ha Bangladesh kin pyrshang borbah ban ioh rung sha kane ka jylla jong ngi.”

U la pynbna ruh ba hadien kane ka jingiakhih jong ka NESO, ka KSU kan pynjur shuh shuh ia ki jingkhynra pyrshah ia ka jingwan buhai shnong beain jong ki mynder sha kane ka jylla.

Haba kylli, u la ong, “Ngim tip balei ka sorkar ka pynslem ban pyntreikam ia ka ILP, hynrei ngi dawa na ka sorkar jylla ba kan buddien tyngeh na ka bynta ban pyntreikam ia ka ILP namar kiei kiei ki jinglong jingman ki la long kiba khia shibun bad ha kawei ka sngi kan long kaba la dier palat. Katba ka sorkar kam pat lah ban pyntreikam ia ka ILP lane kiwei pat ki ain ki ban aijingiada ia ka jaidbynriew, ka KSU kam banse ban shim ia ka ain ha lade.”

Ka KSU ka la rai ruh ban pynjur ka jingpyrkhing ha ki jaka khappud ka Meghalaya khamtam hadien ka jingjia kaba la jia ha South West Khasi Hills.

Katkum ka jingong jong u samla Donald, ki dkhot ka KSU ki dang bteng ban peitngor ha ki jaka khappud bad pynlong ruh ia ki jingtalasi ia ki kali abd ki briew kiba wan rung sha ka jylla da kaba iatreilang bad ki Khlieh nongsynshar shnong kumjuh ki Rangbah Shnong ban ithuh ia ki briew kiba don ka jingartatien.

Ka KSU ka la iatreilang ruh bad ki shipai Border Security Force (BSF) kumjuh ki pulit ka Jylla ban pynkhlain ia ka jingpahara ha ki jaka khappud. Watla katta une u nongialam ka seng u pynpaw ka jingsngewkhia halor ka jingduna bor jong ki pulit ban leh ei ei pyrshah ia ki brie kiba wan rung beain.