Rai ka HYC ban pynlong da ki jingiakhih ba pulom ka Sorkar halor ka Them Metor bad MRSSAB

Syllad | The Rising MeghalayaMay 11, 2025

Ka Hynniewtrep Youth Council (HYC) ha ka jingialang jong ka Central Executive Committee (CEC) kaba la long haka 10 tarik Jymmang ka la pynbna ia ka rai ban pynlong da ki jingiakhih halor ka jingpulom jong ka sorkar ban pynurlong ia ki mat jingdawa ba la slem kiba dang sahteng kiba kynthup ia ka jingpynkynriah ia ki 342 tylli ki longiing Harijan na Them Metor, Iew Mawlong bad ka jingpyntreikam ia ka Meghalalya Residents Safety and Security Amendment Bill (MRSSAB) 2020 kaba thmu ban tehlakam ia ka jingwan rung kynthep jong ki briw kiba na bar sha kane ka jylla.

Haba kren sha ki lad pathai khubor, u president ka HYC u Bah Roykupar Synrem u la ong, “Ngi la shim ia ka rai ban pynlong ia ki jingiakhih bapher bapher pyrshah ia ka sorkar bad ia ki buit pynslem ki jong ka. Ngin ym sngap jar. Ha kine ki khyndiat sngi ki ban wan ngin pynlong ia ki jingiakhih ha kaba ia ki jingtip kiba bniah yn sa pyntip.”

U Bah Roykupar u la ong ba ka kam kaba iadei bad ka jingpynkynriah ia ki longiing na Them Iew Mawlong ka la shu sahteng mynta lah palat 6-7 snem.

Ka sorkar ka la kular ia ki paidbah ka jylla khamtam na Rilum Khasi bad Jaintia ba ia kine ki longiing yn sa pynkynriah noh sha kiwei pat ki jaka. Ka sorkar ka la dep ban ai ha ki ia ka jaka bad ruh ia ka blue print halor ka jingtyrwa ban shna ia ki iing ne flat hynrei kynsan kynsan ki mih sa kiwei pat ki mat,” u la ong.

“Mynta ka sorkar ka la wad da kawei pat ka jaka da kaba kyrpang ia ka Defence Ministry ban ai jaka na ka bynta ban pynkynriah ia kine ki longiing. Ngi shem ba kane kam dei kaei kaei ruh hynrei tang ka buid ban thied ia ka por. Ngim long satia kiba kloi ban pdiang ia kaba kum kane ka buit pynslem jong ka sorkar bad ngi pynrem ia kane ka jingleh bad ngi dawa ruh ba ka sorkar kan shim mardor ia ki sienjam ban pynkynriah noh ia kine ki briew na kane ka jaka,” bynrap une u nongialam ka seng.

Halor ka jingpynslem ban pyntreikam ia ka MRSSAB 2020 bad ka ILP, u president ka HYC u la ong,  “Ngi la iohi ia u Myntri Rangbah ka jylla naduh u snem 2023 u la kular bad pyntip sha ngi ba ia ka MRSSAB la pynphai sha ka sorkar jylla bad ba ka sorkar kan sa khot ia ka jingialang bad baroh ki kynhun bapher bapher. Hynrei naduh u snem 2023 haduh mynta kam pat don satia kano kano ka jingialang ba la khot da ka sorkar halor kine ki artylli ki mat.”

Nalor kata ka HYC ka la buh jingkylli ruh halor ka jingpulom jong ka Anti Narcotic Task Force (ANTF) ban leh ei ei halor ki case kiba iadei bad ka NDPS ha ka jylla.

Une u heh ka HYC u la ong ruh, “Naduh ka 2 tarik Jymmang u snem ba ladep ngi la sdang ia ka jingiakhun pyrshah drok. Hooid ha ka por ba ka jingiakhih ka dang jur bha bad ka ai jong ngi ban tur sha Secretariat ha u bnai Naiwieng ka sorkar lyngba ka shithi ka la kular ba kan shim ia ki sienjam ban pyntreikam ia ka jingdawa jong ka seng ka ban kynthup ha ka ban buh kyrpang ia ka ANTF ba kan khmih beit thik tang ha kaba iadei bad ki case NDPS.”

Hynrei u la ong ba wat hadien ba ka sorkar ka la thaw ia ka kynhun ANTF hynrei ka long kaba sngewsih ba haduh mynta ym pat don tang kawei ruh ka case ba la register hapoh ka ANTF Police Station. Ka jingkylli ka long balei ka ANTF kam shym la shim ia ki sienjam pyrshah ia ki case NDPS.

U la kynnoh, “Ha ka taiew ba la dep haba ngi la pynlong ïa ka jingkhynra pyrshah ïa ki nongkhaii drok, ngi lap ba ki die drok hab shit ba shai khamtam ha Lum Survey, Jhalupara bad kiwei kiwei ki jaka ba jur bha ka jingdih drok. hynrei ym shym la leh ei ei pyrshah ïa ki.”

Haba ther ia ka sorkar bad ia ka ophis jong ka defence estate (DEO), u bah Synrem u la ong, “Ha ka 23 tarik u Jymmang, 2024, ngi la pynlong ia ka jingkhynra ha Lum Survey. Ka sorkar bad u DEO ki la pynthikna ia ngi ba yn leh ia ki kam kiba donkam pyrshah ia ki nongshong shnong beain. Ka jingkylli kam dei tang iaki nongshong beain hynrei kala kylla long ka ktem jong u drok bad kiwei ki kam beain.

“Ngim lah ban sngewthuh balei ba ka sorkar jylla kam shimkhia pyrshah ia kine ki nongshong shnong beain da kaba pynpra ia ki jaka sah beain,” u la pynpaw.