Rah u Samuel bad ka Phibahunshisha iaka nam Nai Khatsaw Synñia bad Lukhimai

Syllad | The Rising MeghalayaOctober 29, 2024

U Samuel Shylla bad ka Phibahunshisha Ryngkhun   ki la ioh ba kin rah ia ka nam Nai Khatsaw Synñia bad Lukhimai, jong  ka tamasa Na Thymmei Festival kaba ar sngi, kata kaba long haka 26 bad 27 tarik u Risaw ba la pynlong da ka Seng Khasi Kmie,  Shillong, ha lympung Weiking Jaiaw.

Ha kane ka jingiakob la don mar 15 ngut ki rang bad ki thei samla na kylleng ka bri u Hynniewtrep, kiba la wan ban iashim bynta sha kane ka jingiakob.

Ki nongiashim bynta ba la wan ban bat ia ka kyrdan kaba ar bad kaba lai (first bad second runners up) ki long ba na ka liang ki shynrang ka leit sha u Pyndapborlang Sawkmie bad u Dawankhraw Kharsyntiew.

Katba na na ka liang  ki samla kynthei ka nam ba ar bad ba lai (first bad second runners up) ki long ka Batriti Myrthong bad ka Darityngkai Khonghat.

Nalor katta la sam ruh ia ki kato katne ki khusnam ha kaba u Ialamjingshai Mylliem u la rah ia ka nam  Best Smile, u Easy Bor Sawkmie Best personality, u Baniaineh Dkhar Best Speaker, u Ridabiang Sungoh Best Ramp Walk, katba u Erickson Kurbah u la rah ia ka nam Best Attire.

Na ka liang ki kynthei, kiba la rah ia kine ki khusnam ki kynthup ia ka Poikimon Suiam kaba la rah ia ka nam  Best Smile, ka Sanki Akor Tangsong Best Personality, ka Balarisha Marbaniang Best Speaker, ka Iadarisha Kharkongor Best Ramp Walk bad ka Sakani Kyndiah ka la rah ia ka nam  Best Attire.

La pyn-i-bang bad ban pyniapbiej shuh shuh ia kane ka janmiet da ka jingiaid pyni ki hep barit ha la ki jong ki jong ki riam ba tynrai  ka jong ki, kaba da pyni shongkun shisha ia kane ka tamasa.

Ha kane ka janmiet jong ka jingiakob bad ba pynut ia kane ka tamasa la wan ban ia sakhi lang  da u bah Cyril V. Darlong Diengdoh, IAS, Secretary to the Government of Meghalaya bad u Swapnil Tembe, IAS, Director of School Education and Literacy, Government of Meghalaya.

Nalor katta la sakhi lang ruh da u President Seng Khasi Kmie Rgh O. Pyngrope, u Dolloi ka Elaka Jowai u ma Puramon Kynjing, ryngkat bad u paidbah byllein uba la hiar ban sakhi ia kane ka tamsa mynta ka snem.