Rah u Dasaman bad ka Levina iaka Run For Unity ha Jowai

Syllad | The Rising MeghalayaOctober 31, 2022

Kum ka dak ban snohktilang haka jingrakhe ïaka National Unity Day- Rashtriya Ekta Diwas, ka ophis u Deputy Commissioner West Jaintia Hills District, Jowai ryngkat ka jingïatreilang ka ophis u District Sports Officer bad ka District Sports Promotion Society ki la pynlong ka jingmareh Run for Unity haka sngi Nyngkong.

Ka National Unity Day kadei ka jingkynmaw burom ïaka sngikha u Sardar Vallabhai Patel, u nongïaleh laitluid ba wanrah ïaka jingtylli ki Jylla ha ri India.

Kane ka jingmareh kala sdang Kiang Nangbah Stadium, Ladthadlaboh Mainroad, Kiang Nangbah Government College, By Pass, Myntdu Bridge, Police Point, New Hill, National Highway bad la pynkut biang ha Kiang Nangbah Stadium.

Ki nongjop haka jingïakop mareh haka liang ki shynrang ki long u Dasaman Kyndait ula wan ba nyngkong hadien ba ula lah ban pyndep ïaka jingmareh kaba hapoh 27:56 minit, ba ar u Dabit Dkhar uba la pyndep hapoh 28:15 minit bad ba lai u Teiboklang Biam uba la pyndep hapoh 28:33 baroh lai ngut kidei na ka Shnong Sabahmuswang.

Haka liang ki kynthei kaba wan nyngkong ka Levina Papiah na Mustem kaba la pyndep ïaka jingmareh hapoh 38:28, ba ar ka Happiness Phawa na Sabahmuswang kaba la pyndep hapoh 39:24 bad ka Ribity Sana na Pynthorsale kaba la pyndep hapoh 48:18.