Rah nam lahduh ki khynnah ka FAM ïaka U-12 Republic Day Cup

Syllad | The Rising MeghalayaJanuary 26, 2020

JOWAI: Ki khynnah ïalehkai jong ka FAM (Football Academy of Meghalaya) kila ïoh ban rah ïaka nam lahduh hadien ba kila pynliem da 3-1 kol ïaka Chilliangraij SC haka 7th Republic Day Cup U-12 Football Tournament 2020 kaba pynïaid da ka West Jaiñtia District Sports Association (WJDSA) ha ryngkat ka jingïatreilang bad bor synshar district jong ka West Jaiñtia Hills District kaba long ha Kiang Nangbah Stadium, Ladthadlaboh, Jowai haka Sngi U Blei.

Ïa kine ki lai kol ka FAM la thep mar shikol da u Alexander Papiah (29), Johnviano Bamon (38), Da-e Kyrpang Phyrngap (50). Ïaka shikol ka Chilliangraij la thep da u Iakisalanmi Lanong (33) da ka penalty.

Ka khusnam Best Goalkeeper la ïoh rah da u Mar-o Shylla jong ka FAM, Top Scorer da u Iakisalanmi Lanong (9 kol) khynnah ialehkai ka Chilliangraj Sc, Man Of The Match Johnviano Bamon (FAM) bad ka nam Player Of The Tournament da u Givenson Suting khynnah ialehkai jong ka Demthring Sc.

Ïa kane ka final la wan ban sakhi da Deputy Commssioner, West Jaiñtia Hills District u Garod LSN Dykes kum u kongsan, u ma Khroobok Passah, District Sports Officer, West Jaiñtia Hills District kum u symbud kongsan bad kila sam ruh ïaki khusnam ha ryngkat ka jingïadonlang ki nongialam bad dkhot jong ka WJDSA.

Ha kane ka juh ka sngi ka WJDSA kala pynkup burom ïaki lai ngut ki khynnah ïalehkai jong ka Dulong da ka song pisa kaba mar T.5 hajar bad ka syrnod.

Kine ki lai ngut ki khynnah ki dei u Clifford Lytan bad u Samchaphrang Lato kiba mihkhmat ïaka jylla haka Sub Junior National Football Championship, kaba ka jylla kala lahduh ha kane ka lympung bad u Tremiki Lamurong uba mihkhmat haka Junior Boys U-17 ïaka H Elias HSS, Shillong haka Subroto Cup International Football Tournament.