Rah nam lahduh ka Mulang Ialong haka 3rd Div ka WJDSA

Syllad | The Rising MeghalayaSeptember 7, 2024

Ka Mulang Ialong kala jop da 1-0 pyrshah iaka Loomsooiung Newhill haka jingiakhun final bad rah syndon iaka nam lahduh jong ka 3rd Division Football Tournament – 4th Adelbert Laloo Memorial Trophy kaba pyniaid da ka West Jaintia District Sports Association (WJDSA).

Kane ka jingiakhun final kaba long haka 7 tarik Nailur ha Kiang Nangbah Stadium, la sakhi ba ka jingiakhun kala long kaba iathain bad iadei bor bha. La rai iaka namjop namrem kine ki arliang mamla haka jingiakhun extra time.

Ka jingiakhun haka por kaba la buh ka jingialehkai kala wai khlem don mano mano, dei hadien bala rah sha ka extra time, u Richard Dhar ula ioh iaka kabu ksiar bad khlem pynlehnoh iaka ula ioh pynkhih iaka jar haka minit kaba 93′ kaba la biang pura iaka Mulang Ialong ban khur iaka nam jop.

Da kane ka namjop u Richard ula khur iaka nam Man of the Match; ka nam Top Scorer sha u rangialehkai ka Myrjai uba la thep haduh 10 kol ha kane ka aiom ialehkai u Elad Dhar; ka nam Best Goalkeeper kala leit sha u rangialehkai ka Newhill u Confirm Bang; bad ka khusnam ‘Player of the Tournament’ sha u Nidaroi Mulieh ka Mulang Ialong.

Ha kane ka sngi la donlang u Bah C Tympang Laloo, President ka Kur Laloo Jowai kum u kongsan; u DSO West Jaintia Hills, Bah Khroobok Passah; ki nongialam bad dkhot nongkitkam ka WJDSA kynthup u Working President Bah EMH Passah, kiba haiing u (L) Adelbert Laloo nalor kiwei kiwei kumjuh ki paidbah nongkyrshan na baroh ar ki kynhun.