Jop ka Mowtyrshiah iaka Khliehmuchut, rah syndon iaka nam lahduh ka 2nd Adelbert Laloo Memorial Trophy ka WJDSA

Syllad | The Rising MeghalayaMay 28, 2022

Ka Maitchaphrang Mowtyrshiah SC kala lah ban pynliem iaka Khliehmuchut Shangpung SC da 2-1 kol haka jingiakhun final jong ka Third Division Football Tournament kaba la tip kum ka 2nd Adelbert Laloo Memorial Trophy kaba pyniaid da ka West Jaintia District Sports Association (WJDSA).

Ha ka jingiakhun final kaba long haka sngi Saitjain ha madan Kiang Nangbah Stadium, ia kine ki ar kol ka Maitchaphrang Mowtyrshiah kala ioh ban thep ha baroh ar kylla jong ka jingiakhun. Shikol kala thep lyngba u Sanborlang Tang (4), kawei pat ka kol kala thep lyngba u Risanlang Dkhar (79).

Ka shikol ka Khliehmuchut Shangpung lyngba u Arwan Phadong (14).

Haba phai sha ka jingiakhun baroh ar liang mamla kine ki kynhun kila pyrshang ban ialehkai bha bad ban ioh thep kol, hynrei naduh ba sdang ka jingiakhun ka Mowtyrshiah kala kham ialehkai bha bad kitei ki ar kol kala biang pura iaka ban rah nam kum ka lahduh.

U kongsan ban wan ban sakhi ia kane ka jingiakhun u dei u District Sports Officer (DSO) West Jaintia Hills District, Ma Khroobok Passah haka jingdonlang ki dkhot nongkitkam ka WJDSA ba kynthup u Working President u Ma EMH Passah, u General Secretary u Ma Lammat O Laloo bad ki khun ki kti jong u (L) Adelbert Laloo.

U ma Khroobok Passah ryngkat kiba haïing hasem jong u (L) u Adelbert Laloo ki la shim ïaka bynta ban sam ïaka khusnam kiba kynthup iaka trophy bad certificate bad song pisa sha ka lahduh bad ka lahduh ba ar kaba T.24 hajar bad T.12 hajar.

Ka khusnam Best Goalkeeper la ïoh da u Damiki Tyngkan jong ka Mookyrdup, Top Scorer la ïoh da u Dangri Phawa jong ka Madankynsaw Mookyndeng bad Risanlang Dkhar jong ka Maitchaphrang Mootyrshiah kiba thep mar 8 kol.

Ka namtam ha kane ka jingiakhun final ne ‘Man of the Match’ la ïoh da u Sanborlang Tang jong ka Maitchaphrang Mootyrshiah katba ka nam Player of the Tournament da u Risanlang Dkhar jong ka Maitchaphrang Mootyrshiah.