Rah ki thei ka West Khasi Hills bad ka ki rang ka Ri Bhoi iaka State Level U-12 Chief Minister’s Football Tournament

Syllad | The Rising MeghalayaJune 16, 2023

Ka lympung ialehkai State Level U-12 Chief Minister Football Tournament bala pynlong ia ka da ka tnat Directorate of Sports & Youth Affairs ka sorkar jylla, ka la poi noh sha kaba kut ha madan ialehkai Phutbol ka SAI STC, NEHU, Shillong haka sngi Thohdieng.

Ha ka jingiakhun ia ka phainal ki khynnah kynthei, ka kynhun ialehkai jong ka West Khasi Hills ki la lah ba kin pynliem noh ia ka East Jaintia Hills da ka tie breaker da 4-2, katba na kaliang ki shynrang ka kynhun ialehkai jong ka Ri-Bhoi District ka la lah ban pynliem noh ia ka West Jaintia Hills District da 4-0.

Haba phai sha ka jingiakhun, ia ki 4 tylli ki kol ka Ri-Bhoi la thep ia ki da u Shanborlang Khongjee uba la thep haduh lai kol (haka mnit 2, 37, 50) kaba dei artad ka hattrick bad sa shi kol la thep da u Prin Lang Roi  L. Nonglait (20) mins.

Katba ha ka jingiakhun ki khynnah kynthei haduh ba la kut ka por ba la buh ka West Khasi Hills bad East Jaintia Hills ka jingiakhun kala wai khlem don mano mano ba ioh pynkhih ia ka jar bad haba la rah sha ka tie breaker, ki khynnah jong ka West Khasi Hills ki la jop da 4-2 ia ka East Jaintia Hills.

Kongsan ba la don lang ha kane ka sngi dei kong R.M Kurbah (IAS) Deputy Commissioner East Khasi Hills, nangta u working president ka Meghalaya State Olympic Association u bah  John F. Kharshiing, u Ian Campbell jong ka kynhun ka H 10.

Ha kane ka sngi la sam ruh ia ki khusnam ba shimet ba kynthup ia ka nam Best Goalkeeper na ka liang ki shynrang  ka leit sha ka Subhrata Rabha (North Garo Hills) , Best Player na ka liang ki shynrang ka leit sha u  Shamiki Myrchiang (West Jaintia Hills), na ka liang ki kynthei ka nam best goalkeeper ka leit sha ka Best Goalkeeper Larishisha Dkhar (East Jaintia Hills) bad Girls Best Player Nazarine D Sangma (West Khasi Hills).