Rah ka Rymbai Shkenshynriah iaka Super Div ka EJHDFA

Syllad | The Rising MeghalayaDecember 15, 2023

Ka Rymbai Shkenshynriah SC kala jop da 1-0 iaka Sutnga SSCC haka final jong ka Super Division Football Tournament- 3rd Kyrmen Shylla contribution Trophy kaba pyniaid da ka East Jaintia Hills District Football Association (EJHDFA) kaba long ha madan phlang plastic ha Diengshynrum haka 15 tarik Nohprah.

U Obadaia Bareh ula kylla long u namtam ha kane ka jingiakhun ha kaba lyngba ka kol ka ba ula thep ha ka minit kaba 73′ kala biang pura iaka Rymbai Shkenshynriah ban ioh rah iaka nam lahduh mynta ka aiom ialehkai. Kumta da kane ka namjop ka Rymbai Shkenshynriah kan ioh ruh ban mihkhmat iaka district haka lympung Meghalaya State League kaban wan.

Ha kane ka sngi la iadonlang u Myntri Sorkar bad MLA ka Khliehriat Ma Kyrmen Shylla kum u kongsan, President MFA Hamletson Dohling bad kiwei kiwei ryngkat bad ki nongkitkam bad dkhot ka EJHDFA

Ka khusnam Best Discipline Team kala leit sha ka Dhana SC, Best Goal Keeper- Shain Muksor jong ka Thangskai Tiger SC, Player of the Tournament – Ioanis Suchen jong ka Sutnga SSCC bad ka Player of the Match Obadaia Bareh jong ka Rymbai Shkenshynriah SC.