Rah ka Rymbai Iawpynsing iaka Super League ka EJHDFA

Syllad | The Rising MeghalayaOctober 10, 2022

Ka Rymbai Iawpynsing kala rah syndon iaka nam lahduh ka Super League 2022 kaba la tip ruh kum 2nd Kyrmen Shylla Contribution Trophy kaba pyniaid da ka East Jaintia Hills District Football Association (EJHDFA) hadien kala wan haka kyrdan kaba ha khliehduh haka miej iakhein poin hadien bala kut ka jingiakhun mynta ka aiom haka sngi Nyngkong.

Ha ka jingiakhun ba khatduh jong ka league kaba long mynta ka sngi ha ki saw jaka haka juh ka por, kata haka por 11 baje mynstep ha madan ialehkai ka Wapungskur, ka Moolamanoh Sc kala iakhaid 1-1 pyrshah iaka Sutnga SSSC, ha Madan ialehkai ha Moopala ka Thangskai TSC kala jop da 4-2 pyrshah iaka Rymbai Pohskur SC.

Katba ha madan Sutnga Pohshnong ka jingiakhun hadpeng ka Khliehriat West FC pyrshah iaka Rymbai Iawpynsing Sc kala kut khlem don mano mano ba ioh pynkhih jar bad haka madan ha Moolamanoh ka Rymbai Wahshnong kala jop da 6-5 pyrshah iaka KWYWSC.

Haba khlein iaka jingkamai poin na ki 7 tylli ki jingiakhun, ka Rymbai Iawpynsing Sc ka la long ka lah duh daka jinglah ban kamai haduh 15 poin, bud sa Sutnga SSSC kaba kamai 13.

Ka Moolamanoh kala kamai 12 poin, ka KWYWSC kala kamai 10 poin, katba ka Thangskai bad ka Rymbai Wahshnong kila kamai mar 8 poin. Ka Rymbai Pohskur 5 poin bad ka Khliehriat West 3 poin.

Kumta da kane kane jingwan ka Rymbai Iawpynsin haka kyrdan kaba khliehduh haka miej iakhein poin kala biang pura iaka ban rah syndon iaka nam lahduh bad kan mihkhmat ruh iaka district sha ka Meghalaya State League 2022.

U James Sutnga, Tournament Director jong ka EJHDFA ula khublei kyrpang iaki 4 tylli ki shnong bala ai sngewbha iaki Madan ialehkai jong ki ban pyndep iaka Super league jong kane ka aiom ialehkai. Ula ai khublei iaki Waheh Shnong bad ki Volunteers jong kine shnong bala iatreilang bad ka association.