Rah ka NorthEast Utd ia ka nam lahduh ka Durand Cup, pynliem ia ka Mohun Bagan ha ka penalty

Syllad | The Rising MeghalayaSeptember 1, 2024

Ka NorthEast United FC ka la ioh ban rah ia ka nam lahduh ha ka sien kaba nyngkong ha ka jingialehkai final jong ka133rd Indian Oil Durand Cup kaba la long haka 31 tarik Nailar ha Vivekananda Yuba Bharati Krirangan Stadium, Kolkata da kaba pynliem noh ia ka Mohun Bagan Super Giant da 4-3 lyngba ka jingiashut penalty.

Ka Mohun Bagan kaba dei ka lahduh jong ka lympung ba la dep ka la thep haduh 2-0 ha ka kylla step lyngba u Jason Cummings bad u Sahal Abdul Samad, kata kawei lyngba ka penalty ha ka minit kaba 11 ba la shut da u Jason bad u Sahal shuwa ban wai ka kylla step 45+5.

Hynrei haba wanphai sha ka kylla miet ka NorthEast ka la iakhun borbah bad ioh ban pyniakhaid lyngba ka kol ba la thep da u Alaaeddine Ajaraie (55) bad u Guillermo Fernandez (58).

Hynrei ha kaba khatduh u rang ap kol ka NorthEast u Germeet Singh u la kylla long u riewshlur da kaba lah ban iada haduh artylli ki kol ha ka jingiashut penalty bad rah syndon ia ka thong.

U Coach ka North East u Juan Pedro u la sei ia ki rangialehkai shakhmat u Guillermo Fernandez ha ka kylla miet bad uba dei ruh ua rangthep kol ba bun eh ha kane ka lympung ialehkai ha kaba la sakhi ruh ia ka jingkylla ha ka rukom ialehkai.

Ka NorthEast ka la kham lah ban banbor ha ka kylla miet ha kaba u Alaaeddine Ajaraie u la ioh ban thep ia ka kol kaba nyngkong. Hynrei tang hadien khyndiat minit u Guillerma u la ioh ban pynbud biang sa shi kol bad pynkhiaid da 2-2, bad kane ka la neh syndon haduh kaba kut bad poi syndon sha ka jingiashut penalty kaba la pynlong ia ka NorthEast bad kan ioh rah ia ka thong jong ka jingjop.