Rah ka Mawlai Presbyterian HSS ïa ka Inter-School Invitational Futsal Competition ka Seng Khasi College

Syllad | The Rising MeghalayaMay 20, 2023

Ka kynhun jong ka Mawlai Presbyterian Higher Secondary School ka la rah ia ka nam kum ka lahduh ka lympung ialehkai Inter-School Invitational Futsal (Boys) Competition, ba la pynlong ia ka ha ki ar sngi, daka Seng Khasi College, kaba long kum shi bynta ka jingrakhe ka jong ka, ia u mawmer ka jingdap ba 50 snem ka jingseng ia kane ka kolej ha kane ka jylla.

Ha ka jingiakhun ia ka phainal kaba ia khaid bad biang bor bha, ka kynhun ialehkai jong ka Mawlai Presbyterian Higher Secondary School ka la lah ba kan pynliem ia ka Seng Khasi College (Higher Secondary Section) da 4-2, ha ka phainal kaba long haka sngi Thohdieng ha madan Weiking, Jaiaw, Shillong.

Khyndiat lada phai sha kane ka jingiakhun, u sawar jong ka nam ialehkai ba tbit u la kham noh bha sha ka kynhun ki khynnah ialehkai jong ka Mawlai Presbyterian Higher Secondary School, ha kaba tang ha ka quarter ba nyngkong jong ka jingiakhun, kane ka kynhun ka la lah lypa ban ioh thep- ia ka kol.

Hynrei wat la katta ruh, ki khynnah jong ka Seng Khasi College (Higher Secondary Section), kim shym la pyndemk satia ialade, hynrei ki ruh ki la iakhun shisha naduh ka mynsiem tad haduh ba ka pynlong ia ki ba kin da lah syndon ban ioh ban thep ia ki artylli ki kol bad ban pynlong ia ka kynhun jong ka Mawlai Presbyterian Higher Secondary School ba kim nym nud satia ban khein sting, hynrei ban long kiba peitngor bad phikir bha naduh kaba sdang tad haduh ban da kut syndon jong ka jingiakhun.

U kongsan bala wan ban sakhi lang ia ka phainal jong kane ka jingiakhun dei u Rgh Richard H Dkhar Secretary ka Governing Body ka College bad synran lang ia u da u Principal u bah WB Rynjah bad kiwei kiwei.

Kane ka lympung ialehkai kaba ar sngi ka long kaba shongshit bad itynnad bha da ka jingwan iashim bynta jong ki phra tylli ki skul ba kynthup ia ka Christian Academy Higher Secondary School, ka Pearly Dew Higher Scondary School, St. Dominic’s Higher Secondary School, Mawlai Presbyterian Higher Secondary School, Seng Khasi Higher Secondary School, Sacred Heart Boys Higher Secondary School, Government Boys Higher Secondary School bad ka Seng Khasi College (Higher Secondary Section).

Katba ia ka jingiakhun baroh kawei la iarap ban pyniaid ia ka da ka kynhun Futsal Dream Team.