Rah ka Mandakaru Tyngkan ia ka nam Miss Lathuthiñ Meghalaya 2024

Syllad | The Rising MeghalayaOctober 19, 2024

Ka samla Mandakaru Tyngkan na ka shnong Saphai, West Jaintia Hills ka la ioh ban rah ia ka nam lahduh ha ka jingiakop “Miss Lathuthiñ Meghalaya 2024” kaba la long ha ka miet 18 tarik u Risaw.

Kane ka jingiakop bhabriew kaba dei shibynta jong ka “Lathuthiñ Festival 2024” la pynlong ha ka sien kaba nyngkong eh da ka East Jaintia Hills Tourism Environment Promotion Society (EJHTEPS ha ka shnong Tuber Sohshrieh, East Jaintia Hills ban yn pynkut iaka mynta ka miet 19 tarik u Risaw da ki prokram pynbyrngia bapher bapher kynthup iaka rwai ka siaw, ki jinghialehkai bad ki jingbam ba bunjait.

Ha kane ka jingiakop thei bhabriew ia ka kyrdan kaba ar la ioh rah da ka samla Ephida Ymbon na Shangpung, katba ia ka kyrdan kaba lai la ioh da ka samla Hakani Phawa na ka shnong Tuber Kmaishnong.

Kiwei pat ki jingsam khusnam ne ki subtitle winners ba kynthup ia ka Best Personality ba la ioh rah da ka Etimon Sungoh na Shangpung, Best Floral Costume ka Rimaka Dkhar na Moolamanoh, Best Rampwalk ka Lanadakanishwa Shylla na Sabahmuswang, Miss Photogenic la ioh da ka samla Deiwamon ika Phawa na Ialong, ia ka khusnam People’s Choice la ioh rah da ka samla Dilist Kyndait na Mutong, katba ia ka khusnam Fusion Queen la ioh rah da ka Eimideimaia Lapasam na Iooksi, WJH.

Da ki bun spah ngut ki paidbah ki la wan iashim bynta sha kane ka tamasa bad ban sakhi ruh ia ki prokram bapher bapher kynthup ha kane ka jingiakop thei bhabriew.