Rah ka Madankynsaw Mowkyndeng Knorsyiem iaka Open Volleyball Tournament u DSO Jowai

Syllad | The Rising MeghalayaNovember 22, 2023

Ka Open Volleyball Tournament kaba lai sngi kynthih kala poi noh sha kaba kut ha kaba ka Madankynsaw Mowkyndeng Knorsyiem kala rah iaka nam lahduh da kaba pynliem iaka Iakrehlang Nangbah SC haka final kaba long ha Pohskur, Mission Compound haka sngi Thohdieng.

Ha kane ka jingialeh final ka Madankynsaw Mowkyndeng Knorsyiem kala pynliem da 25-15, 25-17 iaka Iakrehlang Nangbah SC.

Ia kane ka Volleyball la pynlong da ka District Sports Officer (DSO), West Jaintia Hills District ryngkat ka jingiatreilang ka West Jaintia District Sports Association (WJDSA).

Ha kane ka lympung ialehkai la wan iashim bynta 8 tylli ki kynhun kynthup iaka Lion Mission Compound Sports and Youth Affairs, Khimusniang, Iakrehlang Nangbah SC, Madankynsaw Mowkyndeng Knorsyiem, Kiang Nangbah Govt. College, Spikers, Chullai Brothers Chutwakhu bad ka Lion Mission Compound Dorbar Shnong.

Haka sngi pynkut ia kane ka lympung la wan sakhilang da u Ma EMH Passah, Working President WJDSA kum u kongsan haka jingdonlang u Ma Khroobok Passah, District Sports Officer, West Jaintia Hills, u Ma Patrick Lamare, Vice-President WJDSA, u Ma Lammat-O Laloo, General Secretary WJDSA, u Ma P. Khyriem, u Waheh Shnong Lion Mission Compound bad kiwei kiwei nalor ki nongshah khot sngewbha.

U Ma EMH Passah haka jingkren ula ong, ka West Jaintia District Sports Association ka thrang bad angnud ban kyntiew iaki kam ialehkai sports hapoh ka District kumta ula kyntu iaki dong ki Shnong ban ia shim bynta haki jingiakop bapher bapher kiba ka WJDSA ka khot pynlong na ki por sha ki por.

U Ma Khroobok Passah, DSO-West Jaintia Hills ula ong ka jingpynlong ia kane ka lympung ka long shibynta ban ioh ka District iaki samla donsap ki ban mihkhmat iaka District shaka Meghalaya Games ka ban long ha nongbah Tura naduh ka 15 tarik Kyllalyngkot 2024.