Rah ka Iewrynghep Pres, H Elias Memorial bad St Anthony’s iaka District Level Subroto Cup u DSO EKHD

Syllad | The Rising MeghalayaJuly 5, 2022

Ka Iewrynghep Presbyterian Seecondary School, ka H Elias Memorial Hr. Sec School bad St. Anthony’s Hr Sec School, ki long ki lai tylli ki skul ba la ioh ban rah ia ka nam lahduh ka lympung ialehkai District Level Inter School Subroto Mukherjee Cup Football Tournament 2022, ba la pynlong ia ka da ka ophis jong u District Spoirts Officer, East Khasi Hills District Shillong.

Ha ka jingiakhun ia ki phainal kaba long haka sngi Nyngkong ha madan MFA Turf, Third Ground Polo, ha ka kyrdan iakhun jong ka U-17  ki khynnah kynthei, ki khynnah skul jong ka  Iewrynghep Presbyterian Sec School ki la lah ban pynliem noh ia ka Umpohliew Jingtip Hr Sec School lyngba ka tie breaker kaba long da 7-6.

Ka khana jong kane ka jingiakhun ka long ba haduh ba kut ka por kaba labuh, ki thei ialehkai jong kine ki artylli ki skul ki la lah ban iakhiad da mar lai kol, bad ia kine ki lai kol naka bynta kine ki artylli ki skul la ioh ban thep ia ki da ka Na-I-Sha Nongrum naka bynta ka ka  Iewrynghep Presbyterian Sec School ha ka minit kaba 8, 24 & 69, katba na ka liang ka Umpohliew Jingtip Hr  Sec School ia kine ki lai tylli ki kol la thep ia ki da Haphilakhamti ha ka minit kaba 25, 28 & 72.

Haba phai pat sha ka kyrdan iakhun naka bynta ka U-14 ki khynnah shynrang, ki khynnah skul ka H Elias Memorial Hr. Sec School ki la lah ban pynliem noh ia ka Umpohliew Jingtip Hr Sec School da 2-1, ha kaba ia kine ki ar kol ka H Elias la thep ia ki da u Ricky Kharkongor haka shi minit bad u Medonbanshan Kurkalang ha ka minit ba 16 bad ia ka shi kol ka Umpohliew Jingtip la thep ia ka da u Mebankitlang Mawlong ha ka minit ba 16.

Ka resol na ka kyrdan iakhun jong ka U-17 pat ka long ba ki khynnah ka skul St. Anthony’s Hr Sec School ki la lah ban pynliem noh ia ka Umphyrnai Presbyterian  Hr Sec School da 3-2.

Ia ki lai tylli ki kol naka bynta ka St Anthony’s HSS la thep ia ki da u Pynshailang Jyrwa uba la ioh ban the par kol ha ka minit kaba 13 & 34 bad sa shi kol la thep da u Fabio Rymbai ha ka minit ba 70. Ia ki ar kol ka Umphyrnai Presbyterian Hr Sec School la thep ia ki da u Balamkupar Rynjah ha ka minit kaba 22 bad ka kol kaba ar la thep da u Lurshai Wankhar ha ka minit ba 28.              

La wan ban sakhi lang ia ka phainal kane ka lympung ialehkai da u bah Aibor Khongjee, u rang ialehkai phitbol barim ka India ba la mihkhmat ruh ia ki klob ha ka lym,pung ialehkai jong ka ISL bad mynta u dei u Coach bad ha ka juh ka por u player ka kynhun ialehkai ka Rangdajied United FC, nalor katta la don lang ruh u samla ialehikai Phutbol ba mihkhmat ia ka FC Goa ha ka ISL u  samla Aiban Dohling, nangta Principal of St. Anthony’s Higher Secondary School, Shillong Father Anthony Kharkongor, Principal of H.Elias Higher Secondary School, Shillong Brother Anand P Lakra, Principal of Umphyrnai Secondary School Mrs Biriscy Kharumnuid ryngkat u bah O. Mawthoh DSO EKHD.