Pyrto u Deputy CM, u Sniawbhalang Dhar ia ka jinglen lade jong ki nonghikai

Syllad | The Rising MeghalayaSeptember 5, 2023

Ka District School Education Officer, West Jaintia Hills ka la rakhe ia ka sngi ba kyrpang jong ki nonghikai ne ka Teachers’ Day ha ka jingialang kaba la long hapoh District Library Auditorium ha Mynthong, Jowai mynta ka sngi ba Ar.

Ha kane ka jingialang la ia don lang u Deputy Chief Minister u Sniawbhalang Dhar kum u Kongsan bad u MLA ka Jowai u Wailadmiki Shylla kum u Symbud Kongsan, nalor u Deputy Commissioner BS Sohliya, IAS bad u Superintendent of Police u Bah C Syrti, MPS.

Haba kren ha ka jingialang u Dy CM u la pyrto ia ka jinglen lade bad ka jingnoh synniang jong ki nonghikai ban pynwandur ia ka lawei jong ki khynnah skul ha baroh ki bynta.U la ai ruh ka jingiaroh ia ka jingtrei borbah jogn ki nonghikai, kata da kaba pdiang ruh ba wat hapdeng ka jingsiew kaba rit hynrei ki nonghikai ki la bteng ban ai ka jingshakri ban pynheh pynsan ia ki jabieng jong ki khynnah skul.Ha kajuh ka por u pynshlur ruh ia ki khynnah skul ba kin long kiba trei minot bad ban don ia ka thong ban kiew sha ki kyrdan kiba shalor.

Une u Myntri u la ai khublei kyrpang ruh ia ki nonghikai jong ka district kiba la ioh pdiang khusnam halor ka jingshakri kaba paka tam kaba ki la ai sha ki khynnah bad u la kyntu ia ki ba kin bteng ban noh synniang na ka bynta ka bha ka miat hapoh ka imlang ka sahlang. Ha kajuh ka por u la sam ruh ia ki jingai sngewbha sahkynmaw kumjuh ia ki syrnot sha kine ki nongioh khusnam.

Ha ka kyrdan Secondary ia ka khusnam district award la ai sha ka Kong Wanhok Lamar, Vice Principal ka QC Springside Hr. Sec. School. Ha ka  Upper Primary Level ia ka khusnam la ioh pdiang da u Bah Ohiwot Laloo, Assistant Teacher at Government Girls’ Higher Secondary School, Jowai, katba ha ka kyrdan Lower Primary ia kane ka khusnam la ioh pdiang da ka Kong Hilarious Manner, Head Teacher jong ka  Umladkhur Government LP School, Khonglah.

Ia ka khusnam Best Scout Master award la aiti sha u Jonas K Pala napoh Tome Memorial Scout Troop/Sec. School, Mooralong, Jowai, bad ka khusnam Best Guide Captain award ka leit sha ka Kong Dolly Lamare jong ka Little Angels Guide Company/Sec. School, Moosalyngkat, Jowai.

La pynphuh pynphieng ia kane ka sngi lyngba ki jingrwai, ki jingshad bad kiwei pat ki jingpynbyrngia na ki khynnah skul shibynta ban pynpaw ka jingsngewnguh bad ka jingiaroh halor ka jingtrei shitom ki nonghikai ki jong ki.