Pyrshah u MDC Laban ba khot tender ka SMB ha ki jaka ba hap hapoh District Council

Syllad | The Rising MeghalayaAugust 30, 2025

U MDC ka Laban Mawprem constituency, u Bah Ricky Shullai ha ka 29 tarik Nailar u la pynpaw ka jingkyndit bad pyrshah jur halor ka jingkhot tender ka Shillong Municipal Board (SMB) ia ki kontraktor ban pyntrei ia ki kam pynroi ha ki jaka kiba dang hap hapoh ka jingpeit jingkhmih jong ka Khasi Hills Autonomous District Council (KHADC) kum ha Jaiaw-Mawprem, Mawkhar-Pynthorumkhrah, Laban-Mawprem bad Laitumkhrah-Malki constituency da kaba ong kane kan pynhiar dor ia ka iktiar jong ka KHADC bad pyntlot ia ka bynta jong ki MDC.

U la ong ba ha ka jingshisha ia ki skhim kiba wan na ka 15th Finance Commission la ju pyntreikam lyngba ka KHADC da ka jingiatreilang ryngkat bad ki MDC jong ki constituency.

U Bah Ricky u la kynthoh ba kane ka jingleh jong ka sorkar ka thmu ban pynduh ia ka bor jong ka KHADC kaba la ioh ia ka bor na ka Sixth Schedule jong ka riti synshar ka ri India.

U la pynpaw ruh ka jingsngewkhia ba kane ka jingleh ka buh ka jingma kaba khraw bad ka ban ailad ia ki skhim kiba thmu na ka bynta ki paidbah jong ka District ban pynkynriah lane ban pyntreikam da ki agency kiba shabar khlem ka jingiadon bynta jong ka Council.

Kumta na ka liang une u MDC u la kyntu ia ka jingtuklar lem ba mardor jong u Chief Executive Member (CEM) ka KHADC u Bah S.Rynjah ha kaba iadei bad kane ka kam bad dawa ruh ka jingpynshai na ka sorkar.

“Nga kular ia ki paidbah ka constituency jong nga bad ia ki paidbah baroh ba ngan iai bteng ban iada ia ka bor bad ki bynta kiba iadei jong ka District Council jong ngi bad ban pynthikna ba ki skhim kiba thmu na ka bynta ki briew jong ngi kin ym shah rah ne shah pynkynriah,” u la bynrap.