Pyrshah ki kur ka Raid Buam ban pynskhem Lyngdoh ka Raid

Syllad | The Rising MeghalayaSeptember 28, 2023

Ki Saw kur hapoh ka Raid Buam kiba kynthup iaka Kur Khyriem, Surong, Sumer bad kur Buam kila pynpaw ka jingpyrshah iaka jingthmu ban pynskhem Lyngdoh ia u ma Sumer Buam uba long u Lyngdoh ka Raid Buam la bun bun snem, hynrei u bym pat ithuh da ka Jaintia Hills Autonomous District Council (JHADC).

Ka jingialang kaba la pynlong haka 25 tarik Nailur 2023 ha Umladkhur kaba la khot pynlong da ka Village Court jong ka Elaka Amwi hapoh ka jingpyniaid u Dolloi u ma Jemiwell Pyrtuh kam shym la lah ban rai halor kane ka kam ban pynskhem ia u Lyngdoh ka Raid Buam.

Ha kane ka jingialang la ailad ban iakren iaki dkhot jong ki saw kur halor kane ka jingthmu ban pynskhem Lyngdoh ia u ma Sumer, hynrei ki lai kur bad ki katto katne naki dkhot ka kur Buam ruh ki pyrshah namar ka jingbym hun iaka rukom treikam jong u ma Sumer Buam.

Kumta, kane ka jingialang kam shym la lah ban ai iaka rai ha kane ka jingialang bad nakaliang u Dolloi ruh um pat ai kano kano ka rai bad un shim da kiwei pat ki lad ki lynti ban wanrah iaka jingsngewthuh jingmut kine ki saw kur hapoh ka Raid Buam.

Hashwa kane u Dolloi ula ong ba ia u Sumer Buam la jied kum u Lyngdoh jong ka Raid Buam naduh u snem 1980 bad ka jingkhot jong u iaka dorbar ka long ban pynskhem ia u khnang ba ka District Council kan ithuh noh ia u kum Lyngdoh ka Raid Buam u ban kit ban bah iaka Raid bad peit iaka niam ka rukom.