Pyrshah ka KSU & JSU ïaka rai plie khaii bar ri bad ka Bangladesh

Syllad | The Rising MeghalayaJune 9, 2020

Ka Khasi Students’ Union War Jaintia Circle haka sngi Nyngkong kala leit ban ai dorkhat ban pysngew sha sha u Deputy Commissioner, West Jaintia Hills District Ma Garod LSN Dykes ban dei ban pynsangeh shuwa iaka jingkhaii bar ri hapdeng ka India bad Bangladesh lyngba ka kad kahii na Tamabil, Dawki.

Ha kane ka jingleit ai dorkhat ka KSU La ialam da u President KSU Jaintia Hills District Unit Ohibait Dkhar, Laitphar Syngkrem, President ka War Jaintia Circle nalor kiwei kiwei.

Ka KSU kala dawa ban pynsangeh shuwa ia kane ka kam khaii pateng namar ia mynta kan buh jingeh bad jingma ia ki paidbah ka thain War Jaintia namar ka jingpur sted u khniang jingpang COVID 19 khamtam ha Bangladesh kala nang nang kiew kiba ibit khlam COVID-19.

“Ka sorkar Jylla kam dei ban leh kyrkieh iaka jingplie iaka khaii pateng bad ka ri Bangladesh namar baka sorkar kam lah ban pynbiang ia ki jingdonkam naduh ki lad jingiada ia ki briew bad ban bud ryntih iaki kyn don kiba bthah ka MHA bad ngi tip shai baka District West Jaintia Hills kadei kaba duna doctor bad nongtrei ban jurip iaki briew kiba rung ba mih ha khappud kanlong kaba eh,” la ong ka KSU.

Shuh shuh ka JSU-War Jaintia ruh kala pyrshah jur ïaka jingthmu jong ka sorkar ban plie iaka jingiakhaii hapdeng ka India bad Bangladesh namar ka sngew ba ki dang bun ki jingduna ha ki jingbuh kyndon ba la pynmih da ka sorkar jylla.

Ka JSU kala pynpaw iaka ingsngew ba dei ban pynsangeh beit ia kane ka jingkhaii bar ri namar ba ym tip kumno ki tnad sorkar ban shimkhia ban bud ïaki kyndon ne SOP namar baka kam khaii bar ri, kadei kaba ki nongkhaii bad ki nongtrei sorkar kin hap ban rung ban mih na kawei ka ophis sha kawei pat, ka nuksa tang ka DMR, Custom bad ia ki nongniah trok pat ym tip ki dei kiba wan nangno bad ka JSU ka syier ba lyngba kane ka jingkhaii kan wanrah iaka jingpur u khniang jingang Coronavirus.

Kiwei kiwei ki jingeh kaba ka JSU klala pynpaw namar ba shisien ba la plie ka iew khappud ki trok kin ieng da u lain ha ki surok bah ban rung sha Bangladesh kaba buh jingma iaki shnong ki thaw ha War Jaintia namar ba ki nongniah bad nongbud trok ki shong sah ha ki trok, kaba la pynkhein lypa iaki kyndon ne SOP bala buh ka MHA.