Pyrshah ka HNYF ia ka jingthmu thied jaka ka MID&FC ha Umtham, suba sylla bamsap

Syllad | The Rising MeghalayaAugust 18, 2025

Ka Hynniewtrep National Youth Front (HNYF) ka la dawa na ka sorkar Jylla ba kan pynsangeh noh ia ka jingtyrwa thied jaka da ka Meghalaya Industrial Development and Finance Corporation (MID&FC) lane ka Meghalaya Industrial Development Corporation (MIDC) ha ka shnong Umtham, Ri Bhoi District.

Ha ka shithi ba la ai sha u Myntri Rangbah ka Jylla u Conrad K Sangma ha ka 18 tarik Nailar, u Finance Secreetary ka HNYF u samla Robin Umbah u la kynnoh ba ka jingthmu ban shim ia ka jaka kaba heh 14 akar ha ka jinglut kaba T.21 klur kaba long kumba T.450 shi phut sawdong ka long kaba la heh palat pud.

U la ong ba ha ka jingtohkit ka jong ki, ka dor kaba heh tam na ka bynta ka jaka ha kane ka thain ka long tang kumba T.150 shi phut sawdong kaba la pynmih ka jingsngewkhia kaba jur halor ka jingpyrshang kam bam sap bad ka jingpyndonkam bakla ia ka pisa paidbah.

“Kane ka jingiapher kaba bun shah ka pynmih ia ka jingsngewkhia kaba jur halor ka jingthmu kam bam sap bad ka jingpyndonkam bakla ia ka pisa u paidbah. Ngi sheptieng ba kane ka jingiateh ka lah ban long ka jingpyrshang kaba paw pyrthei ban pyndonkam bakla ia ka pisa paidbah, bad ngi kyrpad ia ka jingtukla ba mardor jong phi na ka bynta ban pynlong ia ka jingtohkit ha kane kane ka kam,” ong une u nongialam ka seng ha ka shithi.

“Halor kane ka jingkynnoh, ngi kyrpad ia ka ophis jong phi ban pynsangeh noh ia kane ka jingthmu shim jaka da ka MID&FC/MIDC ha ka shnong Umtham bad ban pynlong ia ka jingtohkit kaba bniah halor kane ka kam khnang ban tip ia ka dor ba shisha jong ka jaka,” u la ong haba dawa ban leh ei ei pyrshah ia ki ophisar lada lap ia ka jingdonkti ha kane ka jingpyrshang kam bamsap lane ban pyndonkam bakla ia ka pisa paidbah.