Pyrshah ka HITO ia ka jingthmu iasoi MoU bad ka Karnataka halor ka kam ri sniang bad syiar

Syllad | The Rising MeghalayaJanuary 20, 2025

Ka Seng Hynñiewtrep Integrated Territorial Organisation (HITO) ka la pynpaw ka jingpyrshah jur ia ka jingthmu jong ka sorkar ban iasoi ia ka Memorandum of Understanding (MoU) bad ka Karnataka Cooperative Society ha kaba iadei bad ka kam ri sniang ri syiar.

Ka Seng ha u kyrwoh lyngba u President u Bah Donbok Dkhar ha ka 19 tarik Kyllalyngkot ka la ong ba ka la phah da ka shithi sha u Myntri Rangbah ka Jylla u Conrad K Sangma ban pynpaw pyrshah ia kane ka jingthmu iasoi MoU ba la buh ban pynlong ha ka 23 tarik Kyllalyngkot namar ka jingbym don ka jingkhuid jingsuba, ka jingiasyllok paidbah bad da kaba phaikhmat ruh halor ka bha ka miat jong ki paidbah ka jylla.

“Ngi kyntu jur ia ka sorkar ba ka dei ban pyrkhat biang ia kane ka jingthmu iasoi soskular bad ban buh hakhmat ia ka jingiakren kaba don jingmut bad ki paidbah bad ki nongmihkhmat jong ki. Lada ym lah ban pynbeit mardor ia kine ki jingeh, ngim don lad da kumwei pat hynrei ban pynkhreh ia ka jingpan jingmut na u paidbah bad ban mih sha surok ban pynthikna ba ki hok synshar paidbah jong ki nongshnong shnong dei ia kaban pynneh. Ia kum kine ki jingthmu ym dei ban shim sting, hynrei kiba donkam ban shim ia ki sienjam ban iada ia ki jaka puta ia ki jingdon jingem bad ia ki nongshong shnong lyngba ki rai ba la shim khlem da pyrkhat bha ia ka jingma kaba lah ban mih,” u la ong.

U la ong ruh, “Ngi shaniah ba ka sorkar jong phi kan pyni ia ka jingstad bad jingshemphang da kaba sngap ia ki sur jong ki briew kiba ka aijingshakri. Ngi khmih lynti ia ka jubab kaba tei kaba phaikhmat nyngkong eh ia ki jingmyntoi jong ka jylla bad ki nongshong shnong jong ka ha ka jaka ban shah pynbor ha ki bor kiba nabar.”

U la kdew ruh ba ka rai ban pyniaid shakhmat ia kane ka jingiasoi MoU la iohi ba kam shym la long khlem kano kano ka jingai jingmut lang na ka liang ki paidbah ne ban pan jingmut lang na ki. Kane ka jingbym khein snep ka dei kaba iohroit ia ka nongrim jong ka synshar paidbah bad ia ki hok jong ki nongshong shnong ban ioh jingtip bad ia don bynta lang halor ki mat kiba ktah beit beit ia ka kamai kajih bad ia ki jingdon jingem jong ki.

Haba kynnoh ba kam don ka jingiakren hapoh ka iingdorbar thaw ain ka jylla, u president ka HITO u la ong, “Ka long kaba sngewkhia jur ba ia ki kyndon jong kane ka MOU ym shym la iakren hapoh ka iingdorbar thaw ain.Ia kiba kum kine ki mat kiba kognsan ki dawa ia ka jingbishar bniah, ka jingiatai sani khnang ban pynthikna ia ka jinglong hok bad khuid ha ka synshar khdar.”