Pyrshah jur ka KSU-EJH ia ka jingthmu pynlong public hearing pyniar tih mawshun ka MCL

Syllad | The Rising MeghalayaSeptember 2, 2025

Ka Khasi Students’ Union (KSU) East Jaiñtia Hills District Unit ha ka 1 tarik Nailur ka la leit iakynduh ia u Deputy Commissioner ka District bad aiti ia ka dorkhas kaba pynpaw pyrshah ia ka jingthmu ban pynlong ia ka jingpynsngew paidbah ne public hearing ba la pynbna da ka MSPCB ha kaba iadei bad ka jingthmu pyniar tih mawshun da ka Meghalaya Cement Limited (MCL), Thangskai ka ban long ha ka 5 tarik Nailur 2025 ha ka shnong Chiehruphi.

U samla KS Suchiang General Secretary KSU-EJH, ula ong ba na kaliang ka seng ka la pynpaw shai kdar ba kan iai pyrshah jur ia ia kane ka jingthmu tih mawshun namar kane kan wanrah ka jingpynjot kaba shyrkhei ia ka mei mariang bad ia ki jingdong jingem kiba don hapoh jong ka.

“Ki lum ki la syllen lut, ki wahduid kiba sngur ki la jakhlia bad ka lyer kaba ngi ring mynsiem ka la kylla bih bad ka jingshit kyrang ha ka mariang ka la nangkiew katba nangmih ki sngi ki snem. Kordit ia ka thain Narpuh, ki khlaw ba rben ki la duh noh, kaei ka ban jia ia ka pateng ka ban wan, sa katno tylli kita ki hearing pynjot mariang kaba ki trai shnong kin dang iai ailad,” ong une u nongialam ka KSU.

Ka KSU kala pynpaw ba ka pang ruh ka mynsiem haba kynmaw iaka hearing ba la dep, kajuh ka kompeni ha kaba ki pulit ki la bom la tied khlem jingisynei ia ki kynthei khynnah. Ka jingpyrta pynjem rgniew ki mynder ia ka jaidbynriew da kaba ong “maro maro sale ko, khatom karo usko. kine ki paradoh para snam jong ngi kiba ai jingkyrshan kim kynmaw mo ia kane kaba la dep jia. Ngi la long ki mraw ha la ka jong ka ri,” ong u nongialam ka seng.