Pyrshah jur ka JSU ban pynlong ia ka tamasa hajan Civil Hospital, Ialong

Syllad | The Rising MeghalayaMay 17, 2025

Ka aintia Students’ Union (JSU), Jowai Circle haka sngi Thohdieng ka la pynpaw ka jingpyrshah kaba jur halor ka jingthmu ban pynlong ia ka tamasa ka put ka tem ha ka 23 tarik Jymmang hajan ka Civil Hospital, Ialong, West Jaintia Hills.

Ka JSU lyngba u kyrwoh ka la ong ba kane ka jingthmu ban pynlong ia kane ka tamasa hajan ka hospital ka long ka jingpynkhein ia ki kyndon Noise Pollution (Regulation and Control) Rules, 2000 jong ka Environment Protection Act, 1986, bad kaba buh jingma shibun ia ka jingshngain jong ki paidbah, ki jingdonkam ba iadei bad ki lad jingsumar ba kyrkieh.

Ka JSU ka la ong ruh ba hadien ka jingiakynduh ia ka Additional Deputy Commissioner ka West Jaiñtia Hills District, la shem ba na ka liang jong ka ruh kam don jingtip ha kaba iadei bad kane ka tamasa, bad kam don jingtip ruh ba la ki la ioh ne em ia ka jingbit kaba thikna na ka bynta ban pynlong ia kane ka tamasa.

“Ka jingpynlong ia kum kine ki tamasa kiba heh bad kiba pynsawa hajan ka hospital ym tang ba kan pynthut ia ki nongpang hynrei kan wanrah ruh ka jingdheng kali kaba jur bad kaba lah ban pynthut ia ka jingshakri ba kyrkieh ha ka liang ka koit ka khiah,” bynrap u kyrwoh ka JSU.

Ha kajuh ka por ka JSU ka pynrem jur ia ka Tnad Tourism halor ka jingkyrshan ban pynlong ia kaba kum kane ka tamasa khlem da pyrkhat halor ka jingkongsan jong ka koit ka khiah. Ka la ong ruh ba ia kiba kum kine ki tamasa dei ban pynlong sha ki jaka kiba biang bad ki ban ym pynkhein ia ki kyndon jong ka jinglong jar jar, ban ym pynthut ia ka jingshakri jong ki hospital ne buh jingma ia ki nongpang.

Kumta ka JSU ka kyntu jur ia ki bor District bad ka Meghalaya Pollution Control Board nalor kiwei ki tnad ba dei khmih ban tuklar mardor bad pynkynriah ia kane ka tamasa sha ki jaka kiba biang da kaba shim kongsan halor ka koit ka khiah bad ka jingshngain jong ki paidbah.