Pyrshah jur ka AMPSTA halor kano kano ka jingthmu ban pynduh noh ia ka kam nonghikai deficit

Syllad | The Rising MeghalayaJuly 8, 2025

Ka All Primary School Teachers’ Association (AMPSTA) ka la pynpaw ia ka jingpyrshah jur halor kano kano ka jingthmu ban pynduh noh ia ka kam nonghikai deficit ba la dep ban mang ne deficit sanction post.

Ia ka dorkhas kaba iadei bad kane ka jingpyrshah la aiti sha u Myntri ka Tnad pule puthi u Rakkam A Sangma ha ka 7 tarik Naitung.

Ka kynhun ka AMPSTA ba la ialam da u General Secretary u Bah FC Shullai ka la pynpaw ka jingsngewkhia jur ha kaba iadei bad ka Meghalaya Education Grant (MEG) bad ki mat kiba ktah ïa ki nonghikai.

“Ha ka jaka ban pynduh noh ia kine ki kam, ngi khot ia ka sorkar ba kan pynneh bad pyndap ia ki kam kum ki nonghikai deficit,” ong u Bah Shullai.

U la ong ruh ba ka Association ka la pynpaw ka jingsngewkhia ha kaba iadei bad ka jingbteng ia ki kam nonghikai deficit kiba bat da ki nonghikai deficit ba mynta ba kin ym shah ktah, hynrei hadien ba la shongthait yn pynkylla bad pynhap ha ka MEG.

U Bah Shullai u pyntip ba une u Myntri u la pynshai ba lada ki bor pyniaid skul ki aiti lut ia ki jingdon jingem sha ka sorkar, ia ki kam ba la sanction yn pynkylla sha ka kam sorkar bad ki nonghikai kin kylla long ki nongtrei sorkar. Hynrei, lada ki bor pyniaid kim aiti ia baroh ki jingdon jingem, kine ki nonghikai kiba la don lypa kin bteng ban ioh ia ki tulop kum ki deficit hynrei hadien ba la shongthait ia kam yn pynkylla noh hapoh ka MEG.

“Kane ka la buh ka jingeh shibun na ka bynta ka Association ha kaba ngi la kyntu jur ia ka Sorkar ba kan pynmih ia ka jingbthah kaba shai bad ba thikna ia ka jingshngain jong ka kam bad ka jingbteng jong ka jingshakri na ka bnta baroh ki nonghikai dificit kiba mynta bad kiba hadien kumjuh,” u la ong.

U Bah Shullai u la ong ruh haba pdiang bad sngewnguh ia ka jingthmu jong ka sorkar ban pynbha ia ka pule puthi, ka Association ka pyrshah jur ruh ia ki kyndon kiba duna ka jinglong shai, ka jinglong khuid bad ka jingkitkhlieh.

Nalor kata u la kdew ruh halor ki katto katne ki jingsngewkhia ba kongsan jong ka Association kiba kynthup ia ki kyndon ne jingbthah ki bym shai na ka bynta ka jingpynbha katkum ka jingtreikam, ki lah ban pynmih ia ka jingbym ia ryngkat na ka bynta ki skul kiba duna ka jingdon jingem, ka jingai bor ba pura sha ki SMC ne ki GB khlem ka jingpeit bniah bad ka jingkitkhlieh ka lah ban wanrah ia ka jingpyndonkam bakla ia ka bor, ka jingpynslem ban pyndap ia ki kam bathylli jong ki nonghikai bad ka jingpynslem ban thung nonghikai ha ki sobjek ha ka ktien Garo bad Khasi, ka jingbym shai ha ka contributed provident fund (CPF) ba la thep ha ka State Bank of India, Laitumkhrah branch bad ki hukum ba la pynmih da ka sorkar khlem ka jingiasyllok.

“Haba kdew halor kine ki jingsngewkhia, ngi kyntu jur ia ka sorkar ba kan ai ia ki kyndon kiba shai bad bniah ia ki kyndon na ka bynta ka jngai pisa katkum ki jingtreikam, ban pynbha ia ki lad jingkitkhlieh, ban pynbeit ia ka bor jong ki SMC ne ki GB bad ban khanglad na ka jingpyndonkam bakla ia ki bor, ban pynthikna ia ki lad jingida ia ki hok bad ka jingshngain jong ki nonghikai deficit,” u la bynrap.

Nalor kata, ka AMPSTA ka la iakren ruh halor ka jingiateh kular hapdeng ka Tnad pule puthi bad ka Mother’s Union, Tura ha kaba ngi la pynpaw ka jingsngewkhia bad ka jingbym iahap jingmut kaba jur ha kaba u Myntri ka Tnad pule puthi u la pyntip ba ka sorkar ka la shimkhia ia kane ka kam bad kan ap ia ka rai jong u Myntri Rangbah shwa ban pyniaid shakhmat.

Ka AMPSTA ka la kyntu ruh ia ka sorkar ba kam dei ban leh klet halor ki jingshisha kiba don hapoh ki skul bad hapoh ki nonghikai. Ki policy ba la shna khlem ka jingiamir jingmut naduh tynrai kin nangwanrah shuh shuh ia ki jingeh kiba kham jur.