Pyrshah JHADC ïaka CAB ba ktah ïaka Jaidbynriew ka Jylla

Syllad | The Rising MeghalayaJanuary 22, 2019

Jowai: U Ma Madonbai Rymbai, Chief Executive Member (CEM) jong ka Jaiñtia Hills Autonomous District Council (JHADC) ula ong baka Executive Committee (EC) kaba u ïalam bad ki dkhot kiba kyrshan ïaka EC ka jong u; ki pyrshah kaba jur  ïaka Citizenship Amendment Bill (CAB) 2016 namar ba kan ktah ïaka jaidbynriew rit paid ka Jylla bad ka thaiñ Shatei Lammihngi baroh kawei.

U Ma Madonbai Rymbai CEM JHADC haba kren bad ki nongthoh khubor haka jingïadonlang ki EM bad MDC ka konsil ula ong “Lada long kane ka CAB khlem pep ka jaidbynriew kan shah ktah bha bad ka thaiñ North East baroh kawei”. ula ïathuh ruh ba ka EC jong u kala shong jingïalang halor kane ka CAB bad kin ai da ka jingthoh sha ka Ministry of Home Affairs jong ka Sorkar India ban pynpaw ka jingpyrshah. Ha ka juh ka por la kyrpad ban pyllait ïaka Jylla na kane ka aiñ.

“Ka Konsil ka ïeng pyrshah ban pynlong Aiñ ïa ka Citizenship Amendment Bill, 2016 bad u ngeit skhem ba ka Rajya Sabha kan nym mynjur ïa kane ka aiñ namar ba ki bar ri bar jylla kin sa ïoh ban leh trai khlieh ha kane ka  Jylla bad kin kylla bun paid namar ba ngi dei ki jaidbynriew rit paid”, la ong u CEM JHADC Ma Madonbai Rymbai bad wer ïaki paidbah nongshong shnong ban ieng tylli ban pyrshah ïa kane ka aiñ ban lait na ka jingshah thombor ka riti ka dustur bad jinglong trai shnong trai ri.