Pyrkhing ka shnong Sohphoh ia ki briew kiba nabar shnong

Syllad | The Rising MeghalayaMay 19, 2021

Ka dorbar shnong Sohphoh kala buh da ki kyndon pyrkhing ban teh lakam iaka jingpur ka khlam COVID-19. Ka jingpyrkhing kalong ban khang shuwa shipor ia ki briew kiba nabar ban wan rung ban mih shapoh shnong poh thaw tad haduh bala pynbna da kumwei.

Katkum u kyrwoh bala phah u Waheh Shnong, Sohphoh u Mutshwa Thabah ula ong ba ia kane ka kyndon pyrkhing la buh da ka borshnong hadien ka jingsar ka khlam COVID ha kylleng ki jaka haka jylla.

Kane ka jingmana kan ym ktah pat ki ki briew ki ba iaid lynti da ka kali lyngba u surok PWD ba iaid lyngba ka shnong bad ki nongrep ki ba marjan shnong. Hynrei la mana pat ba ki kali ki ba iaid lynti kim dei ban hiar lane sangeh hapoh shnong.

Ka Shnong Sohphoh ka la kyntu ruh ia baroh ki Driver kamai kali Tourist bad local, ki dei ban ai tika  ialade  ban iada na u covid-19 bad kino kino ki driver ki bympat ai tika kim dei ban kit ia ki passenger na shong Sohphoh namar kane kan buh jingma ia ki nongshong shnong

La ban jur iaki nonghikai jong baroh 4 tylli ki skul ba ki dei ban ai tika ialade bad ba ki ba nabar shnong kim dei shuh ban leit ban wan, hynrei ki dei ban sah noh ha shnong.

Baroh ki nong shong shnong ba ki dei ban bud ia ki kyndon ba la ai ka sorkar kum ka ba Deng ia ki Mask, Pynjngai ialade na kiwei pat, Sait bunsien ia ki kti bad ka khmat bad kiwei.

Kiba la biang ka rta 18 snem shaneng ruh la banjur ba kin ai tika ialade khang ban iada na kane ka jingpang khlam ba shyrkhei.

Wat la ka shnong ka khang ia ki ba nabar, hynrei lada don pat kino kino ki briew  kiba donkam kyrpang kum ka ba shim dawai dashin bad kiwei de ki kam bym lah kiar, ki dei ban pyntip shwa sha ki nongialam shnong shwa ba kin wan.

Ka shnong ka la kyrpad ia baroh ba iatreilang khang ban jop bad iada na ka jingpur jong ka khlam.