Pynurlong u CM ia ka jingkular u kpa da kaba plie ia ka Degree College ha Rongjeng East Garo Hills

Syllad | The Rising MeghalayaAugust 20, 2024

U Myntri Rangbah ka Jylla u Conrad K Sangma ha ka 19 tarik Nailar, u la pynurlong ia ka jingkular u kpa jong u, u (L) Purno A Sangma da kaba plie ia ka Degree College hapoh ka shnong Rongjeng, East Garo Hills ha ka jingiadon lang u Myntri ka tnad Pule puthi u Rakkam Sangma, MLA Jim Sangma nalor ki heh ophisar, ki riew pawkhmat ba kiwei kiwei. 

Ïa kane ka College la shna lyngba ka jingiarap pisa da ka RUSA 2.0 ha ka jinglut kaba T. 12 Klur. Ia kane ka College la ai jingbit ban ai jingiarap hapoh ka jingbei tyngka jong ka skhim na ka bynta ki District kiba duna ka jingshakri ha ki Jylla jong ka thain shatei lammihngi (Northeast) kumba la ithuh da ka NITI Aayog.  

Ha ka jingkren CM u la ong ba ka jingtei ia kane ka College ha Rongjeng ka dei ka jingpynurlong ia ka jingkular ba u (L) Purno Agitok Sangma u la ai sha ki paidbah ka thain. “Ka dei ka jingangnud kaba la slem bha jong une u nongïalam jong ngi u (L) Purno Agitok Sangma, uba la kular ban seng ia ka College hangne ​​ha Rongjeng. Mynta ka sngi, um don hapdeng jong ngi hynrei ka jingkular kaba u la ai sha ki paidbah ka la sei soh”, u la bynrap.  

Haba ai khublei ia u Myntri ka tnad Pule Puthi, u MLA ka Rongjeng bad ia ka tnad Pule Puthi, u Myntri Rangbah ka Jylla u la ong, “Ia kane ka jingtei la lah ban pyndep hok, mynta ka dei ban long ka jingkitkhlieh lang jong ngi iwei pa iwei ban pynthikna ba ia kane ka building yn pynkylla sha ka “Temple of Education”.  

Na ka liang u CM haba pynkynmaw biang ba ka pule puthi ka la long ka mat kaba kongsan tam jong ka sorkar, u la ong, “Ka model College ka dei ka nuksa kaba rit na kiba bun kiei kiei kiba ka sorkar ka leh ban pynkylla dur ia ka pule puthi ha ka jylla. Kum ka sorkar, ngin pynthikna ba ka lad kaba bha tam kan ai sha ki samla pule jong ngi”.  

Kumjuh haba pynbna ba ia kane ka College yn ai kyrteng ha ka kyrteng jong u Late Purno Agitok Sangma, u Conrad u la ong, “U (P.A. Sangma) u la don ka jingiadei kaba jan bad ka jingieit ia ki paidbah ka Rongjeng. Kan long kaba dei ban ai kyrteng ia ka College ha ka kyrteng jong u”.

Ka academic session jong kane ka degree college kan sdang treikam mynta u snem da ka Arts Stream. 

Kiba la aijingkren ha kane ka sngi ki kynthup ia u Myntri ka tnad pule puthi u Rakkam Sangma, u MLA u Jim Sangma nalor kiwei pat ki ba la pyrto ia ka jingiohi jngai jong u (L) P A Sangma na ka bynta ban kyntiew ia ki paidbah ka Rongjeng ha ka liang ka pule puthi.