Pyntip u Lahkmen ba theh ka Sorkar T.25 klur ban shna iaki iing skul, haba plie iaka Pamtbuh Govt LP School

Syllad | The Rising MeghalayaMay 13, 2025

U MLA ka Amalrem, u Ma Lahkmen Rymbui ula pyntip paidbah ba ha kine ki 7 snem ka Sorkar Meghalaya kala theh ym duna T.25 klur na ka bynta ban pynbit pynbiang iaki jaka pule ha baroh kawei ka 7-Amlarem Constituency. Kine ki kynthup naduh ki Lower Primary School, Upper Primary School, Secondary School, Higher Secondary School bad College.

U Ma Lahkmen uba long ruh u myntri pule puthi barim ula ong ia kane haba plie iaka iing skul kaba thymmai jong ka Pamtbuh Government LP. School kaba don hajan ka shnong Amlarem haka 13 tarik Jymmang.

Ia kane ka iing skul kaba Ar mala kaba don 7 tylli ki kamra klass la tei haka jinglut kaba T. 44 lak tam tyngka lyngba ka State Mission Education Phase-III. Kane ka skul ka dei kaba la seng naduh u snem 1968 da ka Jowai Riwar Presbytery hadien la shimti noh da ka District Council bad da ka jingnangroi jong ka pule puthi ka sorkar kala shimti noh iaka.

U Ma Lahkmen Rymbui haba kren shuh shuh ula ong ki nongshong shnong jong ka 7-Amlarem Constituency haba phai sha ka pule puthi kala nang kiew haba ianujor bad kiwei bad kala plie lad iaki khynnah ban bteng iaki jingpule jong ki hala shnong. Ula iathuh ka Sorkar kala kyntiew kyrdan iaka Nongtalang Secondary School shaka Higher Secondary School naka bynta ka Arts bad Science, ka Sohkha Higher Secondary School nalor ka Arts bad Science ka sorkar kala plie sa iaka Commerce stream, nalor ka Nongtalang College, bad ula ong kaba sah mynta ka long ban kyntiew kyrdan iaki RMSA kaba don ha Trangblang, Shkenpyrsit bad Mustem.

Ula ong ba haba phai sha ka jingdon kine ki khynnah skul ha Pamtbuh ka long kaba duna, hynrei ula sakhi iaka jingkiew ka jingdon ki khynnah sha ka 100 tam bad u kyrmen skhem ba lyngba ka jingtrei shitom jong ki 4 ngut ki nonghikai kan khring shuh shuh iaki khynnah na kiwei ki jaka ban wan sha kane ka skul.

U Ma Medeling Swer MDC ka thain ula ong, ula iaroh ia MLA uba pyni da ki kam bad kala long ka jingkyrkhu kaba khraw ia ki nongpyniaid skul bad khamtam eh ia ki khynnah skul.

U Ma HC Lamin Incharge SDSEO Amlarem ula buh ka jingkyrpad iaki paidbah nongshong shnong ban sumar sukher bad sngewtrai ia kane ka skul bad kyntu ruh iaki kmie ki kpa ban phah iaki khun ha kane ka skul pule khnang ba ka lawei jong ki kan long kaba phyrnai.

Kiwei de kiba la ai jingkren ha kane ka sngi ki long u Dolloi ka Elaka Stapator Ma D. Lakashiang, ka Head Teacher barim ka Kong Beatiful Surong haka jingialang kaba la pyniaid da u Ma Kynsai Lyngdoh Giri nonghikai.

La pynphuh pynphieng iaka jingialang da ki jingrwai bad jingshad na ki khynnah kane ka skul haka jingdonlang ki nonghikai, ki kmie ki kpa nalor ki nongshah khot sngewbha.