Pyntip u Dy CM ba kan ym don jingtohkit halor ka jingkynnoh ka HNLC pyrshah ia u Sniawbhalang Dhar

Syllad | The Rising MeghalayaMay 21, 2025

U Symbud Myntri Rangbah uba khmih ia ka Tnad Pohiing u Bah Prestone Tynsong u la kyntait ba kan don kano kano ka jingtohkit halor ka jingkynnoh ba dang shen jong ka seng kieng atiar ba la shah khein beain, ka Hynniewtrep National Liberation Council (HNLC) ba u Symbud Myntri Rangbah uba khmih ia ka kam pynroi sor u Bah Sniawbhalang Dhar u donkti ha kaba bei tyngka ia kane ka seng ha ka por ba u dang long kum u Myntri ha ka sorkar barim ba la ialam da ka Congress.

Haba kren sha ki lad pathai khubor haka 20 tarik Jymmang, u Bah Prestone u la ong ba ka sorkar ka sngew ba kam long satia kaba donkam ban pynlong ia ka jingtohkit halor kane ka jingkynnoh jong kane ka seng kieng atiar.

“Nga ieng tang halor ka jingpynpaw da u Bah Sniawbhalang. U la dep ban kren ba um don satia kano kano ka jingiadei lane ban bei tyngka ha ka HNLC. Kumta sa kaei pat ngin dang leh? Nga ieng halor ki jingkren jong u, u la ong haba kynthoh halor ka jingdawa jong ka Seng VPP bad ka Congress.

“Shu buh lada ki don ki katto katne ki briew ki bym sngewtynnad ia kata, ki long kiba laitluid ban wad jingtip shuh shuh bad kat kaei kaba ki kwah, hynrei na ka liang ka sorkar hi ka jingkren kaba u Bah Sniawbhalang u la ai ka dei kaba ngi la pdiang,” bynrap u Bah Prestone.

Haba kylli, u Bah Prestone u la ong, “Ka jingtohkit aiu? Em, peit lada ngi hap ban wanrah ia ka jingtohkit halor ki jingkynnoh, ngi don da ki hajar tylli ki jingkynnoh. Hato phi mut ban ong ba ngi donkam ban tohkit ia ki hajar tylli ki jingkynnoh? Phi donkam ruh ban sngewthuh ia kaei kaba shisha.”