Pyntip u CM ba ka jingtei ia ka Secretariat bathymmai yn pyndep hapdeng jong u snem 2027

Syllad | The Rising MeghalayaMay 9, 2025

U Myntri Rangbah ka Jylla u Conrad K Sangma haka 8 tarik Jymmang u pyntip ba ka jingtei ia ka Secretariat kaba thymmai ha New Shillong Township (NST) kaba la mang ha ka jinglut kaba kot T.1188 klur la khmih lynti ba yn sa lah ban pyndep noh hapdeng jong u snem 2027.

Ha ka jingsynran lang da ki heh ophisar na ka tnad Planning bad Urban Affairs u Myntri Rangbah u la leit jurip ia ki jingtei jong kane ka Secretariat bathymmai ha Umsawli bad pynlong ruh ka jingbishar bniah halor ka jingiaid jong ka kam.

Hadien ka jingjurip u Conrad u la ong, “Ngi khmih lynti ba yn lah ban pyndep noh ia kane ka project katkum ka por ba la buh, kata hapdeng jong u 2027.” U la ong ruh ba kane ka jaka kan ym long tang ka Administrative City kaba thymmai hynrei kan noh synniang ruh ha ka ban pynkylluid shibun ia ka nongbah Shillong.

U la ong ruh ba ia ki katto katne ki surok ha NST la lah ban pyndep bad ki dang don bun ruh kiba ka jingpyntrei ka dang iaid shakhmat. Ki lynti surok ha kane ka Administrative City kan pyniasoh ia ki project bapher bapher ha ka thain.

Ia kane ka Secretariat ba thymmai la buh mawnongrim ha ka 21 tarik Kyllalyngkot, 2025.

Ha kane ka sngi u Myntri Rangbah u la leit jurip ruh ia ka jingpyntrei ia ka Unity Mall kaba dang iaid shakhmat, ia ka surok kaba la dep na Ummir sha Mawkhanu kaba dei kawei na ki surok kaba pyniasoh ia ka Administrative bad Knowledge city ha ki jaka kiba hap hapoh Township.

Shwa kane u la leit jurip ruh ia ka Polo Mall kaba dang shu dep tei thymmai hapoh jong ka Smart City Project kumjuh ia ki jingtei ia ka Wahumkhrah Riverfront Development Project nalor kiwei kiwei.