Pynthut ki Karbi iaka jingshna surok ban pyniasoh iaka shnong Khanduli-Lapangap

Syllad | The Rising MeghalayaJuly 18, 2025

Hadien ka jingshah pyndik ha kaban leit rep leit riang sha ki hali ki pynthor ha ki shnong ba don markhap bad ka shnong Tahpat hapoh Assam, ki nongshong shnong ka Lapangap ki la hap mad biang sa kawei ka jingeh kata ka jingshah khang ban maramot iaka surok ha ki Karbi naka shnong ka Langkeroi.

Kane ka jingjia kala jia haka 17 tarik Naitung hadien ba ki nongshong shnong ka Lapangap kila ia mih paidbah ban maramot iaka surok khyndew kaba pyniasoh iaka shnong Lapangap bad ka shnong Khanduli.

Kane ka jingmaramot iaka surok ka long tang ban pyndap iaki thliew ki syar da ki maw bad khyndew ban suk ka iaid ka ieng haka por slap.

Mynta ka kynti kila ioh ruh da ka puh shi lum (JCB) na u Symbud Myntri Rangbah uba long ruh u MLA ka thain u Ma Sniawbhalang Dhar bad da ka jingshitrhem ki la ia trei borbah ban suk ka leit ka wan.

Hynrei hadien ka jingshah ujor haki Karbi naka shnong Langkeroi ka shnong kaba hapdeng jong ka Lapangap bad Khanduli, ki pulit Assam ki la wan poi sha ka jaka ba maramot iaka surok haka por 4:00 baje janmiet bad ki la phah pynsangeh noh ia kane ka jingshna surok.

U Waheh Shnong jong ka Lapangap u Ma Deimonmi Lyngdoh ula iathuh ba ka jingmaramot ia katei ka surok ka long hadien ka jingshna surok haka shnong Langkeroi da ka sorkar Assam bad ula ong ba ka shnong Lapangap kan iai bteng iaka jingmaramot iaka surok naduh Lapangap shaduh Khanduli.

Wat la shah pynsangeh haki pulit Assam, hynrei kila iaid shakhmat ban pynbha iaka surok, la ong u Ma Lyngdoh da kaba bynrap ba ki nongshong shnong ki la maramot ia katei surok da kaba pyndap tang daka khyndew bad ki maw.

Halor kane ka jingwan pynsangeh da ki pulit Assam, naka liang ka Dorbar shnong Lapangap kala dep ban pyntip shaki bor pyniaid district jong ka West Jaintia Hills bad naka liang ka bor District ruh kala kular ban phah ia u Executive Magistrate ryngkat ki bor pahara ban ai jingiada iaki nongshong shnong katba kim pat dep ka jingmaramot surok.