Pynthikna u SP ba u Raja Raghuvanshi u la shah pyniap; lap ia ka wait na kshaid Weisawdong

Syllad | The Rising MeghalayaJune 4, 2025

Ha ka jingwad bniah kaba khlem sangeh ki bor pulit haka 3 tarik Jylliew ki la lapdien ia ka wait ba la pyndonkam ha kaba pyniap ia u Raja Raghuvanshi ha kaba ia ka metiap jong u la lap na ka jaka riat ha kshaid Weisawdong hadien ba u la jah rngai ha ryngkat ka kurim jong u ha ka jingwan shangkai sngewbha sha Sohra.

“Ngi la ioh tam ia ka wait kaba dang thymmai ba la pyndonkam tang na ka bynta kane ka kam pyniap na kshaid Weisawdong,” ong u Superintendent of Police ka East Khasi Hills, u Bah Vivek Syiem

Da kaba pynthikna ba ka dei ka kam pyniap, u SP u la ong, “Une u nong Indore (Raja) u la shah pyniap, kam don kano kano ka jingkylli da kumwei pat, bad ngi la register case kam pyniap bad ka jingpynduh ia ki sakhi satar. Kam don ka jingartatien ba ka dei ka kam pyniap. Ngi hap ban wad ia ka daw kaba sha lyndet jong kane.”

U la ong ruh ba ia kane ka case ki la shim kum ka kam kaba hakhmat eh bad ka kynhun Special Investigation Team (SIT) ba la khlieh da u Bah SP (City) Bah Herbert Kharkongor ka la iaid shakhmat ban pynlong ia ka jingtohkit halor kane ka jingjia. 

Ia u Bah Herbert yn iarap lang da ki sawngut ki Deputy Superintendent of Police (DSP)-DSP (Crime), DSP (City), DSP (Operation) bad SDPO Sohra nalor arngut ki Sub-Inspector.

Haba kylli u Bah Vivek u la ong ba ki pulit ki dang ap mynta ia ka kaiphod jong ka post mortem ban pynthikna la u Raja u la khlad hashwa ba un shah bret sha riat ne hadien ba la bret ia u shapoh katei ka jaka riat. 

“Ngim pat lah ban ong la u la shah pyniap shwa lane u la shah bret, hynrei hadien ba ngi la ioh ia ka kaiphod jong ka post mortem ngin sa lah ban pynthikna la ki dak mynsaw ki dei kiba lam sha ka jingiap hashwa ban shah bret ne u dang im shwa ban bret ia u, ngin da tip na ka post mortem,” ong u SP.

Nalor kata u SP u la bynrap, “Ngim pat lah satia ban pynthikna, kumta ai ba ki jingshisha kin sa mih paw bad hooid ka tiar ka dei kaba la pyndonkam ha kaba pyniap, kata la ka jingthmu ka long ban lute lane ka jingpynhiar kput lane don kino kino ki daw iashun hapdeng ki nongleh bad une u lanot. Ngi donkam ban khmih shuh shuh ia ki sakhi satar bad tad hadien kane ngin sa lah ban pynpaw, hynrei ia mynta hi ka dang kloi palat ban ong ei ei.” 

Ha kajuh ka por u Bah Vivek u pyntip ba ia ka kurim jong u Raja ka Sonam ym pat shym la lapdien satia bad ka jingwad ban lapdien ia ka, ka dang iai bteng. 

“Lashai ka sngi, ngin bteng ia ka jingwad jong ngi ha ki jaka kiba marjan namar kane ka riat ka dei kaba iar, kumta ngin sa ia wad sha kine ki jaka baroh, kata ha ka jingjngai kaba 1 haduh 2 kilomitar na ka jaka ba la lap ia ka met jong u Raja,” u la ong.