Pynthikna u CM ia ka jingshngain ha ki thain khappud Assam namar ki shitniam Hindu

Syllad | The Rising MeghalayaFebruary 27, 2024

U Myntri Rangbah ka jylla u Conrad K Sangma haka 27 tarik Rymphang u la kular ban ai ka jingiada kaba biang bad ban khmih na ka bynta ka jingshngain jong ki nongshong shnong ha ki thain khappud bad ka Assam namar ki kam leh donbor jong ki shitniam Hindu.

Ia kane u CM u la jubab ia ka jingkylli ha ka zero hour notice ba la wanrah da u nongmihkhmat ka UDP na Nongpoh u Bah Mayralborn Syiem halor ka jingkynnoh shim rai jong ki katto katne ki kynhun shitniam Hindu ban leit tah da ki postar ban kyntu ia ki skul niam Khristan ha baroh ki bynta jong ka Assam ba ki dei ban weng noh ia ki jingtei kiba dei ki shap jong ka niam Khristan bad ia ki iingmane na ki jaka ki jong ki bad ruh ban pynsangeh ban pyndonkam ia ki jaka pule na ka bynta ki kam kiba iadei bad ka niam. 

“Ngin sa pyntip sha ki Superintendents of Police bad DG ha kaba iadei bad ka jingdonkam ban pynkhlain bad pynbun ia ki bor pahara bad ban pynlong ruh ia ki jingiaid pahara khnang ban pynthikna ba ki nongshong shnong kin ioh ia ka jingshngain bad ka jingiada lada mih kino kino ki jingjia,” ong u CM.

Watla katta u Sangma u la ong ba kan ym long kaba dei na ka bynta jong u ba un shim kam khlem pat da bishar bniah ia ki jingshisha baroh. “Kumta ngi donkam ban pynthikna halor kine ki khubor bad ia ki jingioh jingtip shwa ba ngin pynphai bad shim ia ki sienjam,” u la bynrap.

Shuh shuh una ka liang u CM u la ong ruh ba u dang iai bteng ban pynlong ka jingiakren bad u CM ka Assam u Himanta Biswa Sarma ha kaba iadei bad kane ka phang.

Katkum ka jingpynpaw ka jing u la ong ba ki chief secretary jong kine ki ar jylla ruh ki la bteng ban pynlong ia ki jingiakren hapdeng jong ki.

“Ki la don ki lad aijingtip kiba khlain bha lada jia ba ki don kino kino ki jingjia.Na kata ka daw ki lad aijingtip bad ki bor sorkar jong kane ka jylla ba Marjan ka long kaba donkam bha bad ngi iai pynneh ia kane,” ong shuh shuh u CM haba pynthikna ba na ka liang ka sorkar kan ym shim sting satia.