Pynthikna u CM ban thwet ha ban da lap ia kiba donkti halor ka jingshah pyniap u nong Indore

Syllad | The Rising MeghalayaJune 5, 2025

U Myntri Rangbah ka Jylla u Conrad K Sangma haka 4 tarik Jylliew u la ong ba na ka liang ka sorkar kan ym shongthait ban thwet haduh ban da lap ia ki briew kiba donkti ha lyndet ka jingshah pyniap jong u nong Indore u Raja Raghuvanshi, ha kaba ia ka metiap jong u la lapdien na ka jaka riat ha kshaid Weisawdong hadien ba u la jah rngai ha ryngkat ka kurim jong u ka Sonam ha ka jingwan shangkai sngewbha sha Sohra.

“Ngin ym shongthait bad ngin shim ia baroh ki sienjam ban lap ia ki jingshisha bad ban pynthikna ba ki briew kiba donkti ha kane ka kam pyntriem ki dei ban shah pynngat haki kyndon ain,” ong u Conrad haba kren sha ki lad pathai khubor.

Ha kaba iadei bad ka jingdawa tohkit CBI da kiba haiing jong une u lanot halor kane ka jingjia, u Conrad u la ong ba ka sorkar kan sa shim ia ka rai kaba donkam.

“Ka long kaba kongsan ban lap shwa ia ki jingshisha halor kane ka jingjia. Ka long kaba kongsan ba ka jingshisha ka dei ban paw. Kumta ruh kino kino ki sienjam kiba hap ban shim katkum ka jinglong jingman, ngin sa shim ia ka rai ynda la dei ka por. Ia mynta ka dang kloi palat ban ong kaei kaba la jia bad haduh katno ngi tip bad haduh katno ngim tip namar ki don shibun kiei kiei ki bym pat lah ban pyniasoh wat kat haduh mynta katba ngi dang iakren,” u la bynrap.

Nalor kata u Myntri Rangbah u la kular ruh ia kiba haiing hasem jong kine ki shijur na Indore ba ka sorkar ruh ka la pyrshang ban pynkloi katba lah ban lapdien ia ka kurim jong une u lanot kaba dang jah rngai haduh mynta.

Haba shim ia kane kum ka jingjia kaba sngewsih haduh katta katta, u Conrad u la ong ruh ba ka dei ka kam kaba ym pat ju don mano mano ruh ki ban iohi ba kin jia ha kane ka jylla Meghalaya.

“Kane ka jingjia ka la pynkyndit ia ngi baroh. Wat ki trai shnong ruh ki la pynpaw ka jingkyndit, ki kynhun kiba pyniaid ia ki kam jngohkai ruh ki la kyndit halor kaei kaba la jia bad ki dap da ka jingsngewkhia kaba jur. Kumta ka dei kaei kaei kaba ngim shym la poi pyrkhat ba kan wan jia,” u la ong.

Haba pynpaw ba ka Meghalaya barabor ka la long ka jaka kaba burom bha ia ki nongwan shangkai, u Conrad u la ong, “Barabor ngi ju pynthikna ia ka jingshngain jong ki nongwan shangkai. Ha kine ki snem kiba la leit noh, da ki lak ngut ki nongwan shangkai ki la wan sha kane ka jylla jong ngi.

Kumjuh haba pynpaw ka jingsngewlem na ka bynta kiba haiing hasem, u Conrad u la ong, “nga tip ba ka dei da shisha ka jingduh kaba khraw na ka bynta jong ki, hynrei nga kwah ban pynthikna ia kiba haiing hasem ba ngi trei khlem shongthait ban pynthikna ban lap ia ki jingshisha halor kane ka jingjia baroh.”

“Ia mynta hi ngim pat lah ban sngewthuh shai halor kaei kaba la jia, kumno ka la jia, ngi dang bteng ban wad ia ka kurim jong une u lanot kaba dang jah rngai,” u la bynrap.