Pynthikna ka Sorkar ban kynriah ia baroh ki nongdie madan na Khyndailad hapoh ka por, yn kylla kum ka jaka iaid ki briew

Syllad | The Rising MeghalayaJuly 8, 2025

U Nongaiktien ka Sorkar uba dei ruh u Myntri ka Tnad Tourism haka 7 tarik Naitung u la ong u la ong ba ka Sorkar ka la kut jingmut skhem ban pyntreikam ia ka jingbuh por kaba 22 tarik Naitung ban pynkynriah ia baroh ki nongshong die madan na ka thain Khyndailad.

U Bah Paul u la pynpaw ruh ka jingsngew skhem ban pynurlong ia kane ka jingthmu pynkynriah ia ki nongshong die madan da kaba kdew ia ka jingbiang ia ki bor ban pyntreikam ia ka hukum bad ka jingkhlain jong ka mukotduma hadien ka jingpynmih hukum da ka Iingkashari Meghalaya High Court.

Haba kren sha ki lad pathai khubor, u Myntri u la ong, “Ka Sorkar ka khmih lynti ia ka jingbud ryntih ia ka hukum ban pynkynriah ia ki nongdie madan hapoh ka 22 tarik Naitung. Ngi don ia ki bor kiba khlain bad ruh ka hukum jong ka Iingkashari ka la nangpynkhlain ia ka case jong ngi bad hapoh ka 22 tarik Naitung ngi khmih lynti ba baroh ki nongshong die madan kin bud ryntih ia ka jingbthah. Kumta ruh baroh kiei kiei yn sa pyndep lut ha katei hi ka sngi.”

U Bah Paul u la pynpaw ruh halor ki jingthmu jong ka sorkar ban pynlong ia ka Khyndailad kum ka jaka iaid kjat ba kongsan jong ki nongleit nongwan, kynthup ia ki bynta naduh Khyndailad shaduh Jail Road bad Umsohsun ha ryngkat ka jingpynitynnad ia ka jaka bad ki nongshong shnong kin ioh da ki pass khnang ban pyrkhing ia ka leit ka wan jong ki kali.

Ka bynta kaba nyngkong jong ka project ka la iaid shakhmat, ha kaba ka Meghalaya Urban Development Authority (MUDA) ka la dep pynkhreh ia baroh ki jingthmu.

“Kan don ka jingpynitynnad, kan don ka jaka iaid kjat ia ki nongleit nongwan bad tang kito kiba shong ba sah ha kito ki jaka kin ioh ia ki pass khnang ba kin lah ban iaid lyngba ban poi sha la iing, bad kata ruh kan ym long satia baroh shi sngi. Ngin buh da ka por rung bad ka por mih,” u la ong.

Haba kylli, u Bah Paul u la ong, “Ka MUDA ka la ong mynta, baroh kiei kiei ki la don lut. Kane ka dei ka bynta kaba nyngkong. Hadien ba la lah ban pyndep ia ka bynta kaba nyngkong, kumta ruh ngin sa bteng ia ki bynta kiba dang sah.”

Ki nongshong dukan madan kiba mynjur ban pynkynriah kin ioh ia ka song jingkyrshan kaba T.20,000, ka ban kynthup ia ka jingsiew lypa kaba T.10,000 bad hadien ka jingsiew kaba T.2000 shi bnai na ka bynta san bnai.

Nalor kata u Bah Paul u la ban jur ruh ba ka Sorkar ka la ailad bha ia baroh bad ka la ai por ia ki nongdie madan mynta lah palat shi snem ban pynkynriah na ki jaka shong die jingdie ki jong ki.

“Ngi la leh shibun ban ia kano kano ka sorkar kaba ka lah ban leh. Ngi la iaid palat ia ka lynti ka jong ngi, ngi la pynlut na ka bynta kane bad ailad ia ki lah palat shi snem ba kin kynriah noh ia ki dukan jong ki. Ngi la leh ia kaba bha shibun,” u la bynrap.