Pynsngewthuh ka Tep Kyndait UP School halor ka jingsniew u drok

Syllad | The Rising MeghalayaJune 27, 2025

Ka Tep Kyndait Government U.P. School, Tuber Kmaichnong ryngkat ka Student Police Cadets (SPC), ka la pynlong iaka jingpynsngewthuh iaki khynnah skul halor ka jingsniew u drok kaba ka mat pdeng kalong “The harmful impact of drug abuse” ha ka 25 tarik Naitung, kum shibynta ban rakhe ia ka World Drug Day.

Ia ka prokram la pyniaid da u Headmaster, Bah Riquoma Rq. Laloo, bad la ioh jingkren na ki Resource Persons—Kong Niwandaka Dkhar, Bah David D Warjri bad Seibor Bamon, kiba dei ki pulit na Lad Rymbai Police Out Post. La iadonlang ruh u Bah  Onickson Sumer, i/c SDSEO, kum u kongsan.

Ki nongkren ki la ai jingbatai shaphang ka jingma jong u drok, ka jingïaleh jong ki pulit ban tehlakam iaka jingsaphriang u drok bad ka aiñ NDPS Act.

La sam iaki khusnam sha ki nonjop ha ka Drawing Competition ba kynthup ia ka Banisha Lyngdoh kaba wan nyngkong, ka Wanbiang Lyngdoh bad ka Dhwani Shylla kiba wan ba ar bad ba lai kumjuh.

U bah Pynshngaiñ Phawa, Assistant Teacher ula pynkynmaw ruh ia ki aiñ shnong pyrshah ia ka jingthied kiad ne sikret da ki khynnah hapoh 18 snem. La pynkut iaka jingialang da ka jingkular (Pledge) pyrshah ia u drok.