Pynskhem ia ka shnat Pyndenumiong jong ka Seng Kur Warjri

Syllad | The Rising MeghalayaSeptember 24, 2023

Ka dorbar pyllun jong ka Seng Kur Warjri, ka ba kynthup ia kumba khyndai tylli ki kyntoit shnong hapoh ka shnat Pyndenumiong ka la long mynta ka sngi ban khmih ia ki jingdawa jong ki parakur parajait jong kita ki shnong ha ka liang ka bha ka miat jong ka imlang sahlang, khamtam ha ka iap ka im bad ka pang ka jhia.

Ka shnat Pyndenumiong ka dei kawei na ki katto katne ki shnat na ka thaiñ Mairang ka ba la pyniasoh noh ha ka thapniang jong ka seng kmie hadien ba la pynbeit ryntih ba yn ia kit ia bah ia ka lyngkor jong ka Seng Kur Warjri na la ki thaiñ lajong. Ka thaiñ Mairang ka dei kawei na ki jylli ha ka Ri Khasi ka ba kham bun ki parakur parajait Warjri, ha ka ba la dawa ban thaw shuh shuh ki shnat ki ban kit ban bah ia la ki parakur ha kylleng ka thaiñ.

Ha ki khep ba kham ha shwa ka la don ka jingpynskhem ia ki shnat ha Pyndengnongbri, Manai ryngkat ka ba jied ia ki nongialam ha la ki shnat. Kumta ia ka shnat Pyndenumiong ruh la dep ban tyrwa ki kyrteng jong ki nongkitkam thymmai katkum ba la thung da ki riewdkhot ba la buhti ban pynbiang ia ki kyrteng jong ki nongialam.

Ha kane ka sngi la jied bad pynskhem ia ki dkhot nongkitkam thymmai jong ka shnat Pyndenumiong ha ka ba la pynskhem artat da ki nongialam na ka seng kmie ba kynthup ia ki khliehduh, u Bah George Warjri, President, Sunshine Warjri, General Secretary bad katto katne ki ba la ia synran lang. Ki dkhot nongkitkam bathymmai jong ka shnat Pyndenumiong, ka Seng Kur Warjri ki long u Bah Watbor, President, Bah Bekshar Warjri bad Bah John Genesis Warjri kum ki Vice President, Bah Alexander R Warjri, General Secretary, Giman Warjri, Treasurer ryngkat bad kumba arphew ngut kiwei pat ki dkhot nongkitkam ki ba kynthup ruh ia ki nongmihkhmat na baroh khyndai tylli ki kyntoit shnong Dong Bir, Dong Gate, Sangshong, Mawsawa, Langstiehrim, Umwiehsup, Block, Lummaralong bad Lumiew. Ha kane ka dorbar la ai kaiphot ruh ia ki kam jong ka shnat na ki nongkitkam ki ba hashwa bad ka ba kham kongsan ka long ka kaiphot halor ka khanasamari ka ba la dep lum kumba 668 ki longiing Kur Warjri ha ka shnat Pyndenumiong.

Nalorkata, ki nongialam na ka seng kmie ki la batai sani ia ka jingpynkhreh ban rakhe lyngkhuh arphewsan snem ka ba la thmu ban pynlong ha Thynroit ha ka 12tarik Nohprah, 2023. Kumta la kyntu ia ka shnat Pyndenumiong ba kan pynkhreh na ka bynta ban shim bynta shitrhem ha ka jingrakhe bad ban pyrshang ban trei shitrhem ha ryngkat kiwei kiwei ki shnat na ka thaiñ Mairang, khnang ba ka jingrakhe kan long ka ba phuh ba phieng. Da ka ba la pynskhem ia ka shnat Pyndenumiong, ki shnat baroh jong ka Seng Kur Warjri ki la khajoh sha ka laiphew-ar tylli.