Pynshlur u DC East Jaintia Hills ia ki samla pule ban aplai ia ka AICTE scholarship skhim

Syllad | The Rising MeghalayaNovember 1, 2023

U Deputy commissioner East Jaiñtia Hills District, lyngba u kyrwoh ba la pyllait haka sngi ba Ar u pynshlur ia ki khynnah pule jong ka district kiba dei ki nongshong shnong ba pura ka Meghalaya ban bteng ia ki lain jingpule Technical Education ba kin aplai ia ki  scholarship skhim kiba kynthup ia ka AICTE-Pragati Scholarship Scheme kaba na ka bynta ki khynnah kynthei (Degree & Diploma), ka AICTE- Saksham Scholarship Scheme na ka bynta ki samla pule ba don jingduna (Degree & Diploma) bad ka AICTE- Swanath Scholarship Scheme (Degree & Diploma) na ka bynta kiba sah khunswet.

Na ka bynta ka AICTE-Pragati Scholarship Scheme ia ki khynnah kynthei ki dei ban dei kito kiba dang leit pura ha ka first year Degree ne Diploma level course lane second year  Degree lane Diploma Course ha ki jaka pule ba la ithuh da ka AICTE. La shah tang arngut ki khynnah kynthei na kawei ka longiing ba kin aplai bad ba ka jingioh jingkot jong ka longiing kam dei ban palat ia ka T.8 lak shi snem. Dei ban ioh ia ka syrnot ban pynthikna halor kne ka jingioh kamai lyngba ki bor ba dei khmih ia kaba dei ban phah ruh bad ka aplikeshon. Ia ka scholarship yn pynthymmai na ka bynta u snem u ban wan jong ka jingpule tad hadien ba la ioh pdiang ia ka receipt jong ka renewal aplikeshon lyngba ka National Scholarship Portal da kaba phah ia ka Promotion Certificate ba la ioh na ki khliehduh jong ki jaka pule.

Kumjuh na ka bynta ka AICTE- Saksham Scholarship Scheme na ka bynta ki khynnah kiba don jingduna ha ki dkhot met, ki nong aplai ki dei ban long kito kiba la rung sha ka first year Degree ne Diploma level course lane second year jong ka Degree ne Diploma Course lyngba ki jaka pule ba la ithuh da ka AICTE.

Ki samla kiba don ia ka jingduna kaba ym palat ia ka 40% ki dei kiba lah ban aplai ia kane ka skhim. Kumjuh ha kaba iadei bad kane ka skhim ka jingioh jingkot kam dei ban palat ia ka T.8 lak shi snem bad ba dei ban ioh ia ka syrnot na ka bynta kane na ki bor ba dei khmih bad ia kaba donkam ban phah ryngkat ka aplikeshon.

Ha kaba iadei bad ka AICTE-Swanath Scholarship Scheme (Degree & Diploma), ka dei na ka bynta ki khunswet kiba la duh noh iaka kmie ne u kpa lane baroh ar na ka jingshah ktah haka khlam Covid-19 lane ki khun jong ki shipai Armed Forces bad Central Parliamentary Forces kiba pha iaka jingim haba pyndep iala kamram.

Ki nong aplai kim dei ban long kiba ioh myntoi na ka Central Government ne ka State Government lane na kino kino ki AICTE Sponsored scholarships. Ki nongpule ki dei kiba iaka AICTE Approved Institutions bad kumjuh ka courses haka Degree ne Diploma level kaba long haka dur regular (1st, 2nd, 3rd or 4th year). Ka jingioh ka jingkot ka longiing kam dei ban palat iaka T. Rs. 8.0 Lakh shisnem bad dei ban ioh iaka syrnot na ki bor ba dei khmih ban suh lang iaka application.

Ki samla pule kin hap ban apply ia kine ki scholarship lyngba ka online URL www.scholarships.gov.in. Hadien bala dep aplai, dei ban print iaka aplikeshon bad ban sha ki jaka pule ba ki pule ryngkat bad ki sla ban pynshisa.

Ka tarik ba khatduh ban phah ia ki aplikeshon form na ka bynta kine ki skhim kan long ha ka 31 tarik u Nohrpah 2023.