Pynshlur ka DLSA, Jowai iaki khynnah skul ban ieng pyrshah iaki kam thombor haka jingpynsngewthuh iaka ain iada khynnah

Syllad | The Rising MeghalayaAugust 29, 2025

Ka District Legal Services Authority (DLSA), West Jaintia Hills District kala pynlong ïa ka Legal Literacy Class halor ka Protection of Children from Sexual Offences (POCSO) Act, 2012 ha Jawahar Navodaya Vidyalaya (JNV), Mukhla ha ka 28 Nailar 2025.

Ka thong jong kane ka prokram ka long ban pynsngewthuh ïa ki khynnah skul shaphang ki hok ki khynnah, ka jingshah sumar bad ki lad ai jingsumar da ka aiñ. Ka kong DG Kharshiing, Secretary, DLSA, West Jaintia Hills District kala long kum ka riew shemphang ban ai jinghikai ha kane ka sngi.

Ka la batai bniah halor ki bynta pdeng jong ka POCSO Act, kaba kynthup ïa ka jingdonkam ban pyntip ïa ki jingjia bymman, ban sumar na ka jingknieh bor bad ka bynta jong ki skul, ki nonghikai bad ki kmie ki kpa ha kaba thaw ïa ka jingïada kaba janai na ka bynta ki khynnah.

Ka la kyntu ruh ïa ki khynnah skul ba kin don ka mynsiem ba shlur ban ïeng pyrshah ïa kino kino ki jait jingshah leh be-ain bad ka la pynpaw ruh ïa ka jingdon jong ki lad ai jingshakri aiñ khlem siew pisa lyngba ka DLSA.

La pynkut iaka prokram da ka jingiasyllok bad ki khynnah skul, kiba la ai jingkylli bad ban ïashim bynta da kaba pynpaw ïa ki jingmut jingpyrkhat jong ki.

Kane ka jinghikai kala pynlong ïa ki khynnah ba kin kham sngewthuh bniah halor ka POCSO Act bad ka bynta jong ki kum ki nongpynlong shnong ban thaw ïa ka imlang sahlang kaba shngaiñ.