Pynshai ka Kur Phawa Siangshai ba kynnoh iasylla ban beh shnong iaka kur ba shah suba ri Taro

Syllad | The Rising MeghalayaMay 20, 2022

Ka Kur Phawa Siangshai kala kyntait mardor ïaka jingkynnoh Dorbar shnong Saba ba ka Kur Phawa Siangshai ban iasylla beh shnong iala ka jong ka kur kaba shah suba ri ‘Taro’ haka shnong Saba, West Jaintia Hills District.

U president ka Kur Phawa Siangshai u ma Helping Phawa bad u General Secretary u ma Charles C. Phawa haka sngi Palei kila ïathuh ba ka Kur ka la dep shong jingïalang bad ki la pynshai halor ka jingshah pharep ba ka kur ka don bynta ban phah mih ïa katei ka longïing kaba shah kynnoh ri taro.

U Helping Phawa ula ïathuh ba haka 15 tarik une u bnai ki nongïalam ka kur ki la hiar shaka shnong Saba ban ai jingïarap ïaka longïing jong ka kur kaba shah ïeh khunswet hynrei jia ryngkat ha katei hi kajuh ka sngi ka kur kala ïoh jingtip ba kawei ka longïing jong ka kur ha katei ka shnong kala shah kynnoh ri taro bad naduh ka miet 14 tarik ka la shah kawang maw ka ïingsah jong ka.

Ula ïathuh haba ki la poi sha ka shnong Saba ka la don ka jingïalum briew ha kata ka ïing jong ka Kur bad ula ong ba kamdei ka Dorbar shnong. Kumta haba ïadei bad kane ka kam u Ma Helping Phawa ula khot ïa u Waheh shnong ka Saba ban kyntu ïa u ban khang ïaki nongshong shnong ba kimdei ban shoh ban dat ïa katei la longïing bad ula ïathuh ba na ka liang u Waheh shnong Saba ula jubab ba umlah ban kitkhlieh haba ïadei bad kane ka longïing bad kan hap ban mih noh.

Ula pynshai ba na ka liang ka kur kam don jingtip eiei shaphang ka kam shnong kam thaw jong ka Saba bad ka Kur ka khlem shim hi ruh ïa kaba kum kata ka rai.

U Charles C. Phawa General Secretary Kur Phawa Siangshai ula pynrem jur ïa kiba donkti ban pynpait pynpra bad wiang ding ïaka ïing jong ka kur ka jait.

Kane kadei ka kam kaba lait, kumta ula kyntu ïaki bor ba dei peit ba kin shimkhia kloi namar kane ka pyni ïaka dak ba ki briew kim pat sngewthuh ïaka aiñ, la kyntu u Charles C. Phawa.