Pynsangeh ka KSU ia ka jingiakhih ha NEIGRIHMS hadien ka jingtuklar ka Sorkar Jylla

Syllad | The Rising MeghalayaMay 6, 2025

Ka Khasi Students’ Union (KSU) haka 5 tarik Jymmang ka la rai ban pynsangeh shwa shipor ia ka jingiakhih shong kyllain mungor ba khlem pud kaba la sdang naduh ka 1 tarik Jymmang hakhmat ka Administrative Block ka North Eastern Indira Gandhi Regional Institute of Health and Medical Sciences (NEIGRIHMS). 

Kane ka rai ka la wan long hadien ka jingtuklar ka Sorkar Jylla bad hadien ka rai jong ki bor pyniaid ka NEIGRIHMS ban pynsangeh shwa ia ka jingthungkam hapoh ka Institute tad haduh ban da lah ban pynbeit ia ki mat kiba iadei bad ka jingdawa jong ka KSU.

Haba kren sha ki lad pathai khubor hadien ka jingialang ba la pyniaid da u Myntri Sorkar u Bah Paul Lyngdoh ha ka jingiadon lang ki heh ophisar ka NEIGRIHMS bad ki nongialam ka KSU, u Chairman ka KSU Employment Cell u Samla Reuben Najiar ula ong, “Ngi la shim ia ka rai ban pynsangeh shwa shipor ia ka jingiakhih jong ngi namar ngin hap ban bishar ia ki katto katne ki kot ki sla ba donkam kiba iadei bad ki mat jingdawa jong ka seng. Kan ym long kaba iahap ia ngi ba ngin don hangne namar kane ka kam kan dang shim kumba katto katne por.”

“Hynrei, ka jingiakhih ka jong ngi kan dang bteng biang lada ki bor pyniaid ka NEIGRIHMS kim lah ban pynurlong ia ki jingdawa ha kine ki sngi ki ban wan,” u la maham.

U Samla Reuben u la ong ba ia baroh ki mat ym shym la lah ban iakren lut ha kane ka jingialang namar ki don ki mat ia kiba lah ban pynbeit da ka NEIGRIHMS bad ki don katto katne ki mat ki ban hap ban shimkhia da ka Governing Council bad katto katne da ka Ministry of Health & Family Welfare ka Sorkar Pdeng khamtam ha kaba iadei bad ka bhah kyrpang na ka bynta ki nongiakhun kam kiba dei ki ST nalor kiwei kiwei ki mat.

“Na ka liang ka NEIGRIHMS ka la khot iakren ia ki nongialam ka KSU ha kaba iadei bad kane ka bynta lashai ka 6 tarik Jymmang bad ngin sa peit bniah ia ka Roster Register namar ngi la dep ban kdew shai ba ki don shibun ki jingbym shai,” u la byntap.

Nalor kata u pyntip ruh ba ka KSU ka la rai ruh ia ka mat kaba iadei bad ka rta thungkam bad ong, “Ka jingpynduna kynsan ia ka rta thungkam na ka 35 sha ka 30 snem rta kan ktah jur ia ki nong aplai namar kin ym lah ban thep ia kum kine ki kam, bad ha ki snem kiba la dep kiba bun na ki nongaplai kim shym la lah ban thep namar ka khlam Covid bad ruh ba ki kam kiba lait ha ki ophis Sorkar Pdeng ki wan tang shisien ha ka 3-4 snem. Kumta ka jingpynrit ia ka rta kan khanglad ia ki samla kiba dei hok ban ioh bad kiba la pyndep ia ki jingpule ki jong ki hynrei ki bym shym la lah ban aplai kam hapoh kane ka hospital.”

“Ha kaba iadei bad ka jingbhah kaba 80-20 hapdeng ki kynthei bad shynrang, ha kaba sdang ka NEIGRIHMS ka la ong ba ka dei ka rai jong ka Ministry, hynrei ka seng ka la pynpaw ba ka NEIGRIHMS ka don la ka jong ka Governing Council ha ka jingdon lang ki dkhot ka Ministry, kumta ka Governing Council hi ka lah ban shim ia ka rai ban pynbeit ia kane ka jingeh,” bynrap u samla Reuben.

Watla ka NEIGRIHMS ka don ha Meghalaya hynrei ki samla ka jylla ki hap ban thoh ia ki eksam jong ki sha Guwahati, Delhi bad kiwei kiwei ki jylla. Kane ka dei kawei na ki jingeh ba khraw khamtam ia ki samla kiba wan na ki longiing kiba duna ha ka ioh ka kot, bad kane kan kylla long u mawjynthut na ka bynta jong ki. Kum ka seng ka sngewthuh ba ka jylla Meghalaya kam pat don ia ki jingtrei kiba biang ban pynlong ia ki eksam lyngba ki kor computer, kumta ngi aijingmut balei ba ym lah ban pynlong ia ki eksam da ka offline kumba la pynlong ha ki snem kiba la dep kynthup ha u snem 2019.

“Ngi tip ba ka jingpynlong ia ki eksam lyngba ki kor computer kalong ka sienjam kaba kongsan jong ka lawei hynrei tad haduh ba ngin da ioh ia ki jingtei kiba biang ngin ym lah ban pdiang ba ka jingpynlong ia ki eksam kin buh jingeh ia ki samla wad kam wad jam,” bynrap shuh shuh u nongialam ka seng.