Pynrem ka SWS East Jaintia Hills ia u Waheh Shnong Thangskai ba ai syrnod trai shnong ia u bar jylla

Syllad | The Rising MeghalayaSeptember 8, 2023

Ka Synjuk Waheh Shnong East Jaintia Hills District kala pynpaw ba ka dap da ka jingsngewkhia kaba jur halor ka jingnud jong u Waheh Shnong Thangskai, East Jaintia Hills, ban ai sertiphiket nongshong shong bapura ia u wei u barjylla u bym dei satia u trai ri trai muluk na ka shnong Thangskai.

Ka Synjuk Waheh Shnong East Jaintia Hills District ha ka jingialang jong ka Executive Committee kaba long haka sngi Palei, da kawei ka sur ka la rai ban pynrem ia u Waheh Shnong Thangskai namar ba kane ka sertiphikat ka la ktah mynta wat ia ka bhah pule doctor jong ki khun ka Bri U Hynñiewtrep.

“Ka jingleh jong utei u Waheh Shnon, ka shnong Thangskai, nalor ba ka la tuh ia ka bhah pule doctor jong ki khun ka Bri U Hynñiewtrep, kane  kan sa ktah ruh ia ka jaitbynriew trai ri trai muluk ba rit paid jong ngi hadien habud. Ka SWS-East Jaintia Hills District, ka pynrem jur ia kane ka jingleh jong utei u Waheh Shnong,” ong u Hambertus Nongtdu, president jong ka SWS-EJHD ha u kyrwoh.

Ka Synjuk kala ong ba kane ka jingleh jong utei u Waheh Shnong Thangskai, ka la wanrah ruh ia ka jingjahburom bad ruh ka jingduh jingshaniah ia kiwei pat ki Waheh Shnong jong ka East Jaintia Hills District.Ka synjuk ka la dawa jur ruh na ka Dorbar Shnong, Thangskai, bad ruh na ki bor sorkar kynthup na ka JHADC, ban pynduh pyndam noh shisyndon ki ia katei ka sertiphiket jong u tei u barjylla.

Kane ka jingleh une u Waheh Shnong Thangskai ka long kaba ym lah ban pdiang namar ba ka buh ia ka Jaitbynriew ha ka jingeh bad ka jingma bad kala buh iaka jingkyntu bad pynkynmaw ia baroh ki dorbar shnong lane ki waheh shnong hapoh ka district ban long kiba husiar haba ai ia kino kino ki syrnod ban lait na ki jingeh hadien habud.

Ka synjuk ka kyntu ruh ia ki bor sorkar bad ruh ia kiwei kiwei pat ki bor ba ki dei ban da da bishar bniah bha ia baroh ki sertiphiket na ki shnong ba aiti sha ki, bad ruh ban pyntip wut wut sha ki Dorbar Shnong lada don kino kino ki jait sertiphiket kiba don jingartatien.

Na u DC EJH dawa pyndam iaka PRC u samla ioh pule MBBS, kynnoh ka shnong Thangskai ba pyndonkam bakla iaka syrnot shipor