Pynrem ka Seng Khasi Kmie ba pyndonkam bakla ïa ki dur ki dar jong ka Seng da u Youtuber

Syllad | The Rising MeghalayaSeptember 9, 2023

Ka jingïalang jong ka Jylli Pyrkhat Kam (JPK) jong ka Seng Khasi Kmie, kaba la long ha ka 7 tarik  Nailur 2023, ka la ïatai sani bha halor ka jingmih jong  ka video kaba dang shen halor ka phang ‘Hato ka jaitbynriew Khasi ka dei kaba kyrpang’  da ka  YouTube channel kaba la ai kyrteng ‘Na Rympei U Hynñiewtrep’.

U General Secretary Seng Khasi Kmie, Bah Hainess Marbaniang ha u kyrwoh ba la phah ula ong ba ha kaba ïadei bad kane, na ka liang ka Seng Khasi Kmie, ka kren shai ba kam don kano kano ka ban pynpaw ïa ka jingkren shimet jong uno uno u briew, hynrei ka Seng ka sngewkhia ïa ka jingpyndonkam bakla jong u/ka Youtuber ban pyndonkam ïa ki dur ki dar jong ka Seng Khasi, khamtam ïa ka jingpyndonkam bakla ïa ka Lama jong ka Seng bad ïa ki dur lehniam ha u Lum Sohpetbneng uba kyntang.

Ka Seng Khasi ka ïeng ban pynneh pynsah ïa ka niam ka rukom, ki riti ki dustur bad ka tynrai jong ka jaitbynriew halor ka nongrim jong ka ‘Tip kur tip kha – tip briew tip Blei’ bad ban ‘Ieid ïalade bad burom ïa kiwei’ bad  kum kine ki jingleh bym don jingkitkhieh,  barabor, ki don ïa ki jingthmu ba sniew ha lyndet bad ki wanrah ïa ka jingshah ïalam bakla ïa ka jaitbynriew hi baroh kawei da ka jingthmu ban pharia ïa ka.

Ka Seng Khasi namar kata, lyngba une u kyrwoh, ka pynrem jur ïa kum kine ki jingleh sianti bad kyntu ïa u ne ka riew shim kabu ban pyndam noh mardor ïa baroh ki dur ki dar kiba dei jong ka  Seng Khasi, ïa kaba la pyndonkam ha katei ka video bad maham tyngeh ba kum kine ki jingpyndonkam bakla kin ym dei ban jia shuh ha ki por ki ban dang wan.