Pynrem ka DHS ba khang ki paidbah iaka Jongksha CHC; la phah doktor hynrei shah khanglad

Syllad | The Rising MeghalayaSeptember 27, 2024

Ka Director of Health Services (MI) ka Dr FV Kharshiing ha ka 26 tarik Nailur ka la pynpaw ka jingsngew bynniaw kaba jur halor ka jingkhang khyrdep jong ki paidbah nongshong shnong ia ka Jongksha Community Health Centre (CHC) kaba la ktah jur ia ki briew kiba donkam ia ki lad jingsumar hapoh ka thain.

Kum ban shu kdew ba ha ka 21 tarik Nailur, ki nongshong shnong ka Jongksha ki la khang khyrdep noh ia ka Jongksha CHC halor ka jingkynnoh ia ka jingbym don doktor.

Haba kren sha ki lad pathai khubor, ka Dr Kharshiing ka la ong ba ki doktor ki don ia ka hok ba kin shim shuti. “Iwei i la shim shuti kham hashwa bad iwei pat i la shim shuti namar ka koit ka khiah.” Ka la ong ruh ba baroh kine ki arngut ki doktor shwa ba kin shim shuti ki la pyntip sha ki bor district bad ki bor district ha kaba la pynbeit da iwei pat i doktor na East Jaintia Hills i ba trei ha Pynursla.

“Hynrei i doktor iba dei ban wan sha Jongksha CHC na Pynursla ha ka 21 tarik Nailur na ki daw ki bym lah kiar namar ki kam iing ba kyrkieh i la pyntip noh sha ka ophis DMHO, hynrei ka long kaba sngewsih ba kane ka jingkhang khyrdep ia kane ka CHC ka la khanglad ia i ba in wan sha kane ka jaka sumar,” ong ka Dr Kharshiing.

Ka la ong ruh ba watla ki arngut ki doktor kim shym la don, hynrei ka ophis DMHO ka la buh iwei i doktor Ayush bad ka don ruh ka tele-consultation ban iarap ia i doktor bad ki nongtrei ha kane ka CHC.

Nalor kata ka la ong ba ka ophis DMHO ha ka 20 tarik Nailur ka la phah ruh iwei i doktor na Mawiong ban iarap ia i doktor Ayush ha CHC hynrei ka long kaba sngewsih ba la khanglad ia ine i doktor wat ba in ioh rung sha kane ka jaka sumar.

Haba pynrem ia kane ka jingjia, ka DHS ka la ong, “Ki dawai khamtam ki injection ki donkam ban buh ha ki deep freezer bad donkam ban eksamin na ka por sha ka por bad miet bad step, hynrei ka jingkhang tala ia kane ka CHC ka mut ia ki dawai baroh la hap ban shu bret noh bad kane kan wanrah ka jingduh nong kaba khraw ia ki nongshong shnong khamtam kito kiba donkam ia ki lad jingsumar.”