Pynrem jur u nongialam KSU Mawkyrwat iaka bor synshar district South West Khasi Hills

Syllad | The Rising MeghalayaJune 11, 2020

Ka KSU South West Khasi Hills District ka pynrem jur iaka jingkem ki pulit ka South West Khasi Hills District ia u samla Rutherford Lyngdoh, General Secretary KSU Mawkyrwat Circle halor ka jingpharep kulmar halor ka jingshah shoh jong u Engineer, NHIDCL haka 7 tarik ha Mawkyrwat.  Ka KSU ka kren shai ruh ba kane ka jingkem ia u nongialam ka KSU ka dei kum diengtyllaw ban pynrhem iaka jingialeh jongngi ha kane ka thma Corona virus kiba ka sorkar bad ki bor District ka South West khasi Hills District kila fail ban tehlakam da kaba teh pyrkhing tang iaki traishnong, hynrei ki pyllait laitluid pat iaki bar jylla ban rung ban mih katba mon hapoh ka District.

Ka jingkem iaki dkhot KSU ka dei ka ka jingtap eitmiaw iaka jingpyrshah trai shnong jong ka DC South West Khasi Hills District bad ki bor sorkar.  Ka dei ruh ka jingpyrshang ban pynsngapjar iaka KSU kaba ka kren pyrshah iaka jingpyrshah jong ka ban wanrah barjylla ha kaba kum kane ka por ba ka dang don ka jingjur jong u corona. Ka KSU kala rai ba kan iai bteng ban khanglad ia kane namar ngim kwah ba ki jingtreishitom jongki shnong ki thaw hapoh ka District lyngba ki COVID Management Committee kin shu sepei noh daka jingshah laitluid iaki briew ba nabar.

Ka KSU ka sngewthuh ba ngi donkam iaka roi ka par, hynrei ha kane ka por kam pat longshngain ban iakren iaka roi ka par da kaba wanrah barjylla .

“Ngi sngewlyngngoh ba kumno ka DC ka pynkhreh daka appeal sngewkhia ban shah ban wanrah dkhar haka kyrteng development, hynrei kam ju don pat ka jingiasyllok bad ki nongbylla sngi, ki nongdie madan, ki rangli ki Juki ban thawlad ban iarap iaki naki jingeh ha kum kane ka por lockdown,” ong u president KSU South West Khasi Hills District, Forwardman Nongrem

Ula ong shuh shuh ba ka bor District ka la fail ban iada iaka District namar kumba long mynta ka pyrkhing tang iaki traishnong bad kynnoh ruh ba ka ka DC ka leh sop sop ka ai permission iaki bar jylla watla la thikna ba kan nym don ka jaka quarantine ba biang na bynta jongki.

Une u nongialam ula ong ba haba ki bor District ki la fail ban tehlakam ha kane ka por ka KSU ka la rai ban shim hi noh daki sienjam ban khanglad hi iaka jingwanrung kulmar jongki briew nabar jylla haka kyrteng development, hynrei ka buh jingma pat iangi ki traishnong kiba bud ryntih iaki jingbthah ja sorkar.

Ka Deputy Commissioner South West Khasi Hills District ka dei ban shim iaka jingkitkhlieh lada mih positive case ha South West Khasi Hills District namar dei ka Anti local policy jongka hi kaba shah iaki ban rung sopsop hapoh ka District, la ong une u nongialam

Ka KSU kala ong “Phi lah ban kem iaki dkhot KSU, hynrei kin nym kynran dien ban khanglad hi noh iaki bar jylla kiba wanrung hapoh ka jylla bad ka District Administration jong ka South West Khasi Hills District bad ki bor sorkar ki dei ban pynmih da kawei pat ka rai ban khang noh iaki bar jylla ban wan rung haka kyrteng jong ki Highly skilled labourers.”